थुगुसी एमालें धाःसा प्रधानमन्त्रीया दावी मयाइगु
येँ (सन्ध्या टाइम्स)/न्हूम्ह प्रधानमन्त्री ल्ययेगु लागिं आः जुइगु प्रतिस्पर्धाय् निक्वः तक प्रधानमन्त्री जुइधुंकूगु पार्टी एमालें धाःसा ब्वति मकाइगु जूगु दु। थुपालय् एमालें सरकारया नेतृत्व यायेगु लागिं दावी मयायेगु धकाः पार्टीया पदाधिकारीतय् दथुइ औपचारिक निर्णय जूगु खँ सूत्रं धाःगु दु ।
थुपाय् एमालेया भूमिका धाःसा बिस्कं जुइ। एमाले सूत्रं बिउगु जानकारी कथं छुं जुयाः राष्ट्रिय सहमतिया सरकार गठन यायेगु लागिं माओवादी व कांग्रेस दथुइ खँ मिले जुल धाःसा एमाले बाधक जुइ मखु। माओवादी व कांग्रेसया खँ मिले जुयाः चाहे माओवादीया नेतृत्वय् सरकार गठन जुइमा, चाहे कांग्रेसया नेतृत्वय् सरकार गठन जुइमा, अज्याःगु सरकारयात थःपिंसं स्वीकार यायेगु नीति एमालें ज्वंगु दु। थौं सुथय् एमालेया महासचिव ईश्वर पोखरेल कांग्रेस सभापति सुशील कोइरालाया छेँय् वनाः थुकिया जानकारी नं बीधुंकूगु दु। यदि माओवादी, कांग्रेस व मधेसवादी दलत थःपिंसं सरकार गठन याये मफुत व अज्याःगु अवस्थाय् एमालेयात इनाप यात धाःसा उगु इलय् सरकारया नेतृत्व कायेत नं एमाले तयार जुइगु खँ सूत्रं धाःगु दु ।
यदि राष्ट्रिय सहमतिया सरकार गठन मजुल व हानं बहुमतीय प्रणालीपाखें हे सरकार दयेकेमाःगु अवस्था वल धाःसा उगु इलय् चाहिं एमाले न्हापा थें तटस्थ च्वनेगु मखु, न्ह्यागुसां छगू पक्षय् मतदान यायेगु जुइ धकाः नं सहमति दयेकूगु खँ सूत्रं धाःगु दु। थुकिया आधिकारिक निर्णय यायेत थौं च्वनेमाःगु एमालेया केन्द्रीय बैठक धाःसा स्थगित जूगु दु ।
