धर्मोदय सभाय् संविधानसभाया सांसदत नं उम्मेदवार
येँ (सन्ध्या टाइम्स)/नेपाःया बौद्ध धर्म सम्बन्धी फुक्कं संघ संस्थाया मातृसंस्था धर्मोदय सभाया थ्वहे वइगु भदौ ४ जुइगु ६८ क्वःगु केन्द्रीय साधारण सभाय् उपाध्यक्ष पदया नितिं संविधानसभाया निम्ह सभासद्तय्सं नं उम्मेदवारी बियादीगु दु। सभासद्पिं इन्द्र बहादुर गुरुङ व पद्मज्योतिं उगु उम्मेदवारी बियादीगु खः ।
स्वम्ह उपाध्यक्षया निंतिं वय्कःपिं निम्ह सभासद् नापं पुलांम्ह सांसद लक्ष्मीदास मानन्धर, प्रा. सुवर्ण शाक्य, रत्नमान शाक्य, नानिमैंया मानन्धर व गोविन्द चित्रकारं उम्मेदवारी बियादीगु दु। धर्मोदय सभाया इतिहासय् हे महासचिव व कोषाध्यक्ष पदया निंतिं थुगुसी न्हापांखुसी भिक्षुपिं नं उम्मेदवार जुयाबिज्याःगु दु। थुगुसी महासचिव पदया नितिं बुद्ध विहारया प्रमुख भिक्षु कोण्डन्य, युवा बौद्ध अध्ययन मण्डलया पुलांम्ह नायः सुचित्रमान शाक्य व सानुराजा शाक्य उम्मेदवार जुयादीगु दु। अथे हे कोषाध्यक्ष पदया निंतिं आनन्दकुटी विहारया प्रमुख भिक्षु धर्ममूर्ति व बज्राचार्य संरक्षण गुथिया महासचिव सागरमान बज्राचार्यं उम्मेदवारी बियादीगु दु। स्वदँ कार्यकालया निंतिं न्हूगु नेतृत्व ल्यइगु थुगुसीया साधारण सभाया नितिं म्हिगः उम्मेदवारी दर्ताया ज्या जूगु खः ।
थ्व झ्वलय् सचिव पदय् त्रिरत्न मानन्धर, सहसचिवय् अशोकानन्द बज्राचार्य व सहकोषाध्यक्षय् निर्मला कंसाकार धाःसा निर्विरोध जुइधुंकूगु दु । धर्मोदय सभाया इतिहासय् न्हापांखुसी महासचिव व कोषाध्यक्ष थेंज्याःगु मू मू पदय् भिक्षुपिं हे उम्मेदवार जुयाः पिहां वःगुलिं थुगुसी उगु निगू पदय् कडा प्रतिस्पर्धा जुइगु अनुमान यानाहःगु दु। अथे हे ७ म्ह दुजःया नितिं बसन्तीदेवी बज्राचार्य, भिक्षुणी डा. अनुजा, बद्रिनारायण मानन्धर, पुष्पराजन शाक्य, विजयबहादुर गुरुङ, इन्द्रसिद्धि गुभाजु, विश्व विजयरत्न बज्राचार्य, केशव चित्रकार, बलराम चित्रकार, कृष्णकुमार प्रजापति लगायत १३ म्हेस्यां उम्मेदवार बियादीगु दु। धर्मोदय सभाय् द्धःछिम्ह मतदाता दु। थुगुसी अध्यक्ष जुइगु पाः थेरवादी बौद्ध समुदायया खः ।
