बँपसः चीकेगु लागिं स्थानीय जनताया पहल

राजधानी येँदेय्या बँपसः चीकेगु लागिं थनया स्थानीय क्लब व खलः पुचःत सक्रिय जुयाः छगू बोर्ड हे गठन याःगु समाचार पिहां वःगु दु। बँपसः चीकेगु लागिं स्थानीय मनूत हे सक्रिय जूगु थ्व धाथें नं लसताया खँ खः। राजधानी येँदेय्यात पूवंक हे अस्तव्यस्त जुइक बँपसः तइपिं करिब करिब फुक्क हे मनूत राजधानीं पिनेयापिं खः। उमिसं न राजधानी शहरया अर्थ थू, न येँदेय्या मर्म थू। पिनें वयाच्वंपिं मनूतय्सं यानाः थन लः, धः, प्रदुषण, यातायातया समस्या जक मखु बजाः लागाय् बँपसःया नं उतिकं हे तःधंगु समस्या जुयाच्वंगु दु। बँपसः तइपिं मनूतय्सं आः संगठित जुयाः येँदेय्या स्थानीय वासिन्दायात समेत हाथ्या बीगु ज्या याना हःगु खँत न्यने दयाच्वंगु दु। उकिं उपिं थौं प्रदुषण व अव्यवस्थाया ल्याखं जक खतरा खःसा कन्हय् सुरक्षाया ल्याखं नं खतरा जुइफुगु संकेत वयेधुंकूगु दु। राजधानीया बजाः लागाय् च्वंगु फुक्कं पसःत शनिवाः बन्द यायेमाः धकाः अन हे ज्या याइपिं ज्यामितय्सं दवाव बियाहःगुया लिउने नं थ्वहे बँपसःयात हे प्रवर्द्धन यायेगु षडयन्त्र सुलाच्वंगु दु। थुलि दुरदर्शी सोच ज्वनाः थन पसः तयाच्वंपिं बँ पसल्यात कन्हय् वनाः राजधानी व राजधानीवासीया लागिं गुलि तःधंगु हाथ्या जुइ धइगु खँ थुकिं नं स्पष्ट याः। उकिं ट्राफिक, यचुपिचु, सतक बजाः व्यवस्थापन, प्रदुषण व सुरक्षाया दृष्टिकोणयात समेत ध्यानय् तयाः थन तयातःगु बँपसःयात विस्थापन याये हे माः। बँपसल्यातय् समस्या समाधान यायेगु थाय् उपिं गनं वःगु खः, अन हे दु। उकिया लागिं नं संघीय व्यवस्था माःगु खः। राजधानीया ल्याय्म्हत जागरुक जूगु लसकुस यायेबहः जू ।

More Stories Like this