परीक्षण

नर्मदेश्वर प्रधान

खँयाखँय्
हितिइ लः मवः। हाहाकार जुइ। छु याये? गय् याये? न्हिंन्हिं तनाव। तुं खँ। समस्या हल जुइ। सुझाव वइ। सल्लाह बी। मतिइ वइ। तुं खनां छु याये? लः दइ मदइ। दयाः हे नं लः त्वने जिउगु जुइ ला? मजुइ ला? विश्वासया संकट। गुलिस्यां तुं खनी। लः दइ मखु। ल्हाना छ्वइ। लः दइ। परिक्षण याकी। त्वने मजिउ। ठहर जुइ। समस्या समाधान जुइ मखु। न्हापा न्हापा तुंया हे भर। तुंया लखं हे ज्या तरे जुइ। थौंकन्हय्। अथे मखु। तुं खंसां मजिउ। लः त्वने जिउ मजिउया खँ वइ। तुं खनाः नं लःया समस्या पूवनी मखु ।

हिति लः मवः। गबलें वइ। वःसां हितिया लः अथे हे ला खःनि। फोहोर। धःलिसें जाना वइ। लः जाँच याके। हितिया लः जक गन शुद्ध जुइ। किटाणु दइ। उबलय् तिंख्यलय् फुटबल म्हितः वने। ब्वांब्वां वने। लः त्वने प्याःचाइ। महांकाःद्यःया न्ह्यःने हिति दु। हिति झ्वलय् म्हुतु दिके। लः त्वने। छगू सासलं। खूब त्वने। प्याःचाः लंके। उबलय् छेँय् त्वनेगु लः हितिया हे जुइ। हितिया लः मिखा तिसिनाः त्वने। अविश्वास भ्याःभति हे दइ मखु। थौंकन्हय्। अथे मखु। हितिया लः तप्यंक मत्वना। लः दायेके। फिल्टर याये। अले तिति लः विश्वासमैत्री जुइ। त्वने। गनं वने। फिल्टरया लः दइ मखु। प्याःचाइ। प्याःचाः नियन्त्रण याये। लँय् लूगु लः त्वने फइ मखु। लखं अनेक ल्वय् हइ। ग्यासें वइ। थौंकन्हय् हितिइ वइगु लःया विश्वास मदु। शंकास्पद जुइ। मनं मखंगु लः कथुं कुहां वनी मखु। त्वने फइ मखु। विश्वासया संकट ।

थौंकन्हय् बजारय् अनेक शुद्ध लः न्याये दइ। लः न्यानाः त्वनेगु चलन वइ। लँय् वने। प्याःचाइ। शुद्ध लःया बोटल। न्याये दइ। न्याये। ज्या काये। त्वने। तर व हे खँ वइ। विश्वासया संकट। अखबारय् ब्वने। बजारया शुद्धगु लः नां जकया शुद्ध। फुक्क अपेय। हानिकारक। त्वने बहः मजू। बजारया शुद्धगु लः त्वने वा मत्वने। द्वन्द्व जुइ। मनय् लुइ। गज्याःगु दुर्दशा। कथु प्याकेत नं थौं द्वन्द्वया शिकार जुइमाः। लः। अति आवश्यक वस्तु। आम जनस्वास्थया विषय। सम्बन्धित निकायं थ्वया गुणस्तरया चिउताः तयेमाःगु। गुणस्तर नियन्त्रण यायेमाःगु। तर दुर्भाग्य। लःया गुणस्तरया जाँच याकि। ध्यबा नकि। उत्तीर्ण जुइ। गुणस्तरया चिं काइ। बजारय् अनेक कथंया लः वइ। शुद्धगु लः बिक्री जुइ। तर बुखँत वया हे च्वनी। बजाःया कथित शुद्धगु लः स्वास्थया लागिं हानिकारक। त्वने अयोग्य। घातक ।

विश्वासया संकट। थौं हरेक ख्यलय्। फलफुल। तरकारी। केँ। फुक्क दुषित। अखाद्य। हानीकारक। थुमि परीक्षण जुइमाः। बजारय् वये न्ह्यः। शंका तीब्र जुइ। चिकं, हलू, घ्यः न्हिंन्हिं माःगु वस्तुत। न्हिंन्हिं थुमि परीक्षण। जाँच पास। सम्भव जुइ मखु। जुइमाःगु जुइ। मिखा तिसी। छुं विकल्प दइ मखु। भगवानया भरोसाय् भाग्यजोग्यया खँ।
विश्वासया संकट। दैनिक आवश्यकताया खँय् जक मखु। थौं थ्वं सामाजिक जीवनय् नं थिया हइ। आक्रमण याइ। गुलिखे म्हिगःया सामाजिक विश्वासया संरचना। थौं दुनी। मनू अविश्वासया जंगलय् लाःवनी। विश्वासया वातावरण। असुलभ जुया वइ। विश्वास। थ्वया प्राप्तिया निंतिं तःधंगु परीक्षण पार यायेमाली। अग्नि परीक्षा सामना यायेमाली ।

लाखौं ल्याय्म्हल्यासेत थौं देशं पिने। विश्वया थाय्थासय्। चिच्चाः दनी। इमिसं हिचःति हायेकी। आर्जन याइ। देशय् ध्यबा छ्वया हइ। थौं देशयात आप्रवासय् वःपिं मजदूरतय् हिचःतिं लही। इमिगु परिश्रमं देशया आर्थिक अवस्था थामथुम जुइ। देशया आर्थिक मेरुदण्ड। सामाजिक विश्लेषकतय्सं धाइ पिने मजदुरीइ वंपिं गुलि ल्याय्म्हल्यासेतय् सामाजिक संरचनाय् विकृति खनेदइ। विश्वासया संकट। विदेशं ल्याय्म्हल्यासेत देशय् वइ। परिवारलिसे पुनर्मिलन जुइ। तर अपसोच। विश्वासया संकटं छ्यं ल्ह्वनी। खँ वइ। पिनें वइपिनि हिया परीक्षण जुइमाः। एड्स मुक्तिया प्रमाणपत्र कायेमाः। परिवार। अले सुरक्षित जुइ। तुं खने। तुं खनां जक मगाः। लः त्वने जिउ मजिउ परीक्षण यायेमाः। लुमनी। पिनें वःपिं। देशय् च्वपिं। तिपूतय् दथुइ नं वहे न्ह्यसः लुइ। परीक्षण यायेमाः। हि जाँचे याकेमाः ।

म्हिगः। इहिपा यायेत मिसा मिजंया जातः स्वइ। तू। मतू। ज्योतिषं धाइ। ब्याहाया लिधंसा जातः जुइ। थौं ई हिली। व्यवहार पाइ। जातः मखु। ब्याहा न्ह्यः। मिसामिजंया हि परीक्षण जुइमाः। खँ वइ। सुरक्षित इहिपा अले तिनि सम्भव जुइ। थौं मनूतय् जीवनशैली पाइ। फसं पूगु लप्ते थें। गुम्हं गन। गुम्ह गन। संयोगं नाप लाइ। मिलन जुइ। स्वापूया तुं खनी। प्याःचाः लंकेत स्वइ। तर तुं खनाः जक गन गाइ? सुरक्षित तृप्तीया खँ वइ। इमि तुंया लः परीक्षण यायेमाली ।

मचा थःम्ह खः मखु। डिएनए परीक्षणं क्यनी। थ्व प्रविधि थौंकन्हय् झीगु देशय् नं वइ। तनावपूर्ण वैवाहिक जीवन। आधुनिक दाम्पत्य जीवनशैली। मचा दइ। मचा थःम्ह ख कि मखु? मिजंयात शंका लुइ। थौंकन्हय् थुज्वःगु शंकाया घटना वृद्धि जुजुं वइ। विश्वासया संकट डिएनए परीक्षा याकः वइपिं अप्वया वइ। बुखं धाइ। थौंया जीवन शैली। शंका। अविश्वास। पलाः पतिकं परीक्षणया खँ वइ। न्हि छ्यायेत नं परीक्षण। चा छ्यायेत नं परीक्षण। मचा बुइ। मचाया नं परीक्षण। डिएनए परीक्षण। मचाया बौ अले तिनि ढुक्क जुइ। अज्याःगु न्हि नं वइ। थुकी शंका मदु।
झीगु परम्परा। मचा बुइ। मचाबू ब्यंकी। बौनं मचायात मुलय् काइ। मचायात स्वीकार याइ। मचा नालेगु अनुष्ठान खः थ्व। समाज हिला वइ। म्हिगःया चलनं ज्या बी मखु। मचाबू ब्यंकेत डिएनएया सर्टिफिकेट बौपिंत पूर्वसर्त जुइ। अनिवार्य ताइ। थज्याःगु चलन नं वइ। शंका मदु ।

तुं खने। लः छ्यले न्ह्यः लःया परीक्षण यायेमाः। परीक्षण अनिवार्य ताइ। थ्व खँ लुमनी। सुनां स्वइतं छ्यले न्ह्यः तुंया लः थें परीक्षण यायेमाःगु न्हि वइ। परीक्षण प्रत्येक ज्याखँया पूर्वाधार जुइ। विश्वासया संकटया इलं धाइ ।

More Stories Like this