राष्ट्रिय सरकार दयेकेत राष्ट्रपतिपाखें आव्हाण

कांग्रेसय् ल्वापु झन झन तच्वल

येँ (झीगु स्वनिगः)

प्रधानमन्त्री झलनाथ खनालं थःगु पदं राजीनामा बियादीगु कन्हय् खुन्हु म्हिगः सोमवाः हे राष्ट्रपति डा. रामवरण यादवं सहमतिया राष्ट्रिय सरकार दयेकेत संविधानसभाय् दुथ्याःगु दलतय्त आव्हाण यानादीगु दु ।
नेपाःया अन्तिरिम संविधानया धारा ६३ या उपधारा १ कथं वइगु भदौ ४ गते आइतवाः सनिलया ५ ता ई तकया दुने राष्ट्रिय सहमतिया नितिं म्याद बियादीगु खः । राष्ट्रिय सहमतिया सरकार दयेके मफत धाःसा राष्ट्रपतिं संविधानया धारा ६३ या उपधारा २ कथं बहुमतीय सरकारया नितिं संसदय् निर्वाचन यायेत आह्वान यानादीगु प्रावधान दु । प्रधानमन्त्री झलनाथ खनालं आइतवाः बहनी राष्ट्रपति निवासय् वनाः थःगु राजीनामा बियादीगु खःसा उगु राजीनामा राष्ट्रपतिपाखें स्वीकृत याये धुंकूगु अवस्थाय् आः खनाल कामचलाउ प्रधानमन्त्री जुयाच्वंगु दु ।

न्हूगु सरकार मवःतले खनालया नेतृत्वय् दुगु मन्त्री परिषद् कामचलाउ सरकार जुयाः च्वनीगु अवस्था दु । अथे राष्ट्रपतिं सहमतीय राष्ट्रिय सरकारया नितिं आह्वान यानादीवं संविधानसभाया दक्ले तःधंगु दल एकीकृत नेकपा -माओवादीं) थःगु नेतृत्वय् सरकार दयेकेत गृहकार्य सुरु याःगु दु ।राष्ट्रिय सहमतिया सरकार दयेकेगु नितिं माओवादी पार्टीया नेतातय्सं थीथी दलया नेतातलिसे औपचारिक नापं अनौपचारिक रुपं वार्ता सुरु याःगु खः । उखे प्रमुख प्रतिपक्ष नेपाली कांग्रेसय् धाःसा प्रधानमन्त्रीया उम्मेदवारया सवालयात कयाः ल्वापु झन झन तच्वया वःगु दु । कांग्रेसया विधान कथं संसदीय दलया नेता जक प्रधानमन्त्रीया उम्मेदवार जुइ दैगु प्रावधान दुगुलिं संसदीय दलया नेता जुइगु नितिं ल्वापु तच्वया वःगु दु । कांग्रेसया उप सभापति रामचन्द्र पौडेल थौंकन्हय् संसदीय दलया नेता जुयाच्वनादीगु खःसा न्हापा पार्टीया उपसभापतिंनिसें महामन्त्री तक नं नियुक्ति याःगु इलय् छगू कथं पार्टीया सभापति सुशील कोइराला व वरिष्ठ नेता शेरबहादुर देउवाया दथुइ संसदीय दलया नेता पौडेलयात चीकाः देउवायात यायेगु धकाः मौखिक सहमति जूगुलिं उकियात कार्यान्वयन यायेमाल धकाः नेता देउवां सभापति कोइरालायात दबाव बियाः वयाच्वंगु आः अन्तिम इलय् थ्यनीगु अवस्था वःगु दु । बरिष्ठ नेता देउवां पार्टीया ११४ म्ह सांसदत मध्ये बच्छिसिबें अप्वः सांसदतय्गु ल्हाःचिं तकं मुंकाः थः संसदीय दलया नेता जुइगु कुतः यानाच्वंगु खः । देउवायाके ५८ म्हसिबें नं अप्वः सांसदतय्गु ल्हाःचिं दु धकाः दावी यानाः वयाच्वंगु दु । थःगु कुतः नापं न्हापा मौखिक रुपं जूगु सहमति कार्यान्वयन मयात धाःसा संसदीय दलया नेता विरुद्ध अविश्वासया प्रस्ताव तयेगु धकाः देउवां धयाच्वनादीगु खः ।

आः थौं मंगलवाः तकया दुने नं सभापतिं सहमतियात कार्यान्वयन मयात धाःसा बुधवाः कन्हय् अविश्वासया प्रस्ताव दर्ता यायेगु धकाः तयारी याःगु दु । खास यानाः म्हिगः सोमवाः हे अविश्वासया प्रस्ताव दर्ता यायेगु धकाः देउवा पक्षं तयारी याःगु जूसां पार्टीया केन्द्रीय पदाधिकारीतय्सं थौं मंगलवाः तक पिइमाली धकाः धाःगुलिं थःपिन्सं कन्हय् बुधवाः जक अविश्वासया प्रस्ताव दर्ता यायेगु तयारी यानागु दु धकाः कांग्रेसया छम्ह नेतां जानकारी बियादीगु दु ।