दलतय्त ४ गते तक म्याद
राष्ट्रिय सहमतिया सरकार दयेकेत राष्ट्रपतिया आह्वान
येँ (सन्ध्या टाइम्स)/प्रधानमन्त्री झलनाथ खनालं राजीनामा बियादीवं राष्ट्रिय सहमतिया सरकार दयेकेगु नितिं आह्वान यासें राष्ट्रपति डा. रामवरण यादवं दलतय्त छवाःया म्याद बियादीगु दु। वय्कलं अन्तरिम संविधान २०६३ कथं वइगु भाद्र ४ गते आइतवाः सनिलया ५ बजे तकया नितिं समय सीमा तयाः दलतय्त आह्वान यानादीगु खः ।
राष्ट्रपति यादवं थौं संविधानया धारा ३८ या उपधारा १ कथं संविधानसभाय् प्रतिनिधित्व यानाच्वंगु दलतय्त उगु आह्वान यानादीगु खः। उगु ईया दुने राष्ट्रिय सहमतिया सरकार दयेके मफुत धाःसा राष्ट्रपतिं न्हापा थें हे हाकनं ई थप यानादीगु सम्भावना नं दु ।
खनाल नेतृत्वया सरकार दयेके न्ह्यः नं राष्ट्रपतिपाखें सहमतिया सरकारया नितिं समय सीमा बियादीगु खःसा दलतय्गु हे इनाप कथं हाकनं म्याद थप यानादीगु खः। वयां लिपा नं सहमतिया सरकार दयेके मफयेवं तिनि बहुमतिय प्रणाली कथं प्रधानमन्त्री ल्ययेत आह्वान यानादीगु खः। आः नं राष्ट्रिय सहमितया सरकार दयेके मफुत धाःसा संविधानया धारा ६३ या उपधारा २ कथं बहुमतीय सरकारया नितिं संसदय् निर्वाचन प्रक्रिया जुइ ।
म्हिगः बहनी राष्ट्रपतियाथाय् राजीनामा पौ लःल्हानादीम्ह प्रधानमन्त्री झलनाथ खनाल आः कामचलाउ प्रम जुयादीगु दुसा वय्कलं थौं संसदय् संवोधन यानादीगु ज्याझ्वः दु ।
