माओवादी व कांग्रेसया दावी
येँ (सन्ध्या टाइम्स)/राष्ट्रपति डा. रामवरण यादवं सहमतीय सरकार गठन यायेत आह्वान यानादीवं एकीकृत माओवादी व नेपाली कांग्रेसं थःथःपिनि पार्टीया नेतृत्वय् राष्ट्रिय सहमतिया सरकार दयेकेगु निंतिं थनिंनिसें हे थीथी दलया नेतातलिसे सहलह ब्याकेगु ज्या तिव्र गतिं न्ह्याकूगु दु। एकीकृत माओवादीं पार्टीया उपाध्यक्ष डा. बाबुराम भट्टराईया नेतृत्वय् राष्ट्रिय सहमतिया सरकार दयेकेगु नितिं सहलह ब्याका हःगु दु। उखे नेपाली कांग्रेसया बरिष्ठ नेता शेरबहादुर देउवां थःत पार्टीपाखें उम्मेदवारी घोषणा याकेगु नितिं पार्टी सभापति सुशील कोइरालायात दवाव बीगु ज्या यानादीगु दु। प्रधानमन्त्रीया उम्मेदवार जुइगु नितिं संसदीय दलया नेता थः हे जुइत देउवां थौं संसदीय दलया नेता रामचन्द्र पौडेलया विरुद्धय् अविश्वासया प्रस्ताव तइगु समेत सम्भावना अप्वया वःगु दु ।
