बँपसः चीकेगु नितिं कान्तिपुर विकास बोर्ड
येँ (सन्ध्या टाइम्स)/येँया नेवाःतय्गु पुलांगु वस्तीइ लँय् लँय् बँ पसः तयाः यातायात सुचारु यायेगु निसें लँय् जुइत पंगः जुयाच्वंगुलिं सामाजिक संघ संस्थात जानाः आः बँ पसः चीकेगु अभियान सुरु यायेत्यंगु दु। उकिया निंतिं कान्तिपुर विकास बोर्ड समेत गठन याःगु दु। येँ मनपा वडा नं. २२, २४, २५, २७ व ३० य् क्रियाशील जुयाच्वंगु ४५ गू सामाजिक संघ संस्था जानाः रामकृष्ण महर्जनया नेतृत्वय् उगु बोर्ड दयेकूगु खः ।
येँ मनपा व प्रहरी नाप जानाः बँपसः चीकेगु अभियान न्ह्याकेगु खँ महर्जनं धयादीगु दु। वय्कलं स्थानीय संघ संस्थात जानाः न्ह्याः वने मफुत धाःसा थःगु छेँ क्वय् हे थःपिं पिनें वःपिं थें जुइमालीगु अवस्था वयेफु धासें ल्याय्म्हतय्गु सक्रियताय् उगु बोर्ड गठन यानागु जानकारी बियादिल ।
नेवाःतय्गु पुलांगु वस्तीइ छुं जुयाः एम्बुलेन्संनिसें दमकल तक नं यंके मजिइक बँ पसः तइपिं झन झन अप्वया वःगुलिं स्थानीय नेवाःत हे सक्रिय जुइमाः धकाः महानगरपालिकानाप सहलह ब्याकाः उगु कथं कान्तिपुर विकास बोर्ड गठन यानागु खः धयादिसें वय्कलं आः मोहनि नखः नं वयेत्यंगुलिं थःपिंसं थुगु अभियानयात याकनं हे न्ह्याकेगु नापनापं मोटरसाइकल पार्किङया विषययात नं सरोकार तया वनेगु धयादीगु दु ।
