छखा छेँया प्यम्हेसित स्यानातल

येँ (सन्ध्या टाइम्स)/कञ्चनपुरया भीमदत्त नगरपालिका वडा नं. १ या मटेना गामय् वंगु चान्हय् छखा हे छेँया प्यम्हेसित स्यानातःगु अवस्थाय् लुइकूगु दु। स्थानीय धर्मानन्द नाथया छेँय् वया मां ५० दँ दुम्ह हरियादेवी नाथ, कलाः २५ दँ दुम्ह धनादेवी नाथ, ६ दँ दुम्ह काय् रवि नाथ व ४ दँ दुम्ह म्ह्याय् रेनुका नाथयात स्यानातःगु अवस्थाय् लुइकूगु खः। थौं सुथय् ७ बजे जःलाखःलातय्सं अनया बरमदव प्रहरी चौकीयात घटनाया बारे जानकारी बिउगु खः ।

प्रहरी घटनास्थलय् थ्यनेधुंकूगु दु। घटनास्थल थ्यंम्ह प्रहरी निरीक्षक चक्रबहादुर शाहं धयादी कथं प्रारम्भिक छानबिनय् छुं नं कथंया ल्वाभः प्रयोग यानातःगु खनेमदु। घटना जूगु लागा सदरमुकाम महेन्द्र नगरं ९ किलोमिटर तापाक्क दु। छेँथुवाः धर्मानन्द धाःसा बेपत्ता जुयाच्वंगु दु ।