अबुं खुसिइ वांछ्वःपिं तःकेहेँ मलूनि
फलेवास(पर्वत)/अबुं म्वाःम्वाकं खुसिइ वांछ्वयाः स्याना बिउपिं निम्ह मस्तय् लाश मालेत समस्या जूगु दु।मोदीखोलाय् तसकं वयाच्वंगु खुसिबालय् वांछ्वया बिउपिं पिपलटारी गाविस-९ या नमुना व नवीना तिवारीया सीम्ह मालेत समस्या जुयाच्वंगु खँ जिल्ला प्रहरी कार्यालय पर्वतं धाःगु दु। वंगु श्रावण १५ गते चान्हय् ११ बजे खुसिइ वांछ्वया बिउपिं थ्व निम्ह तःकेहेँया शव झिंन्यान्हु लिपा तकं लुइके मफुनि। सीम्ह मालेगु लागिं विशेष पुचः हे दयेकाः परिचालन यानातःगु दुसां उमिसं लुइके धाःसा मफयाच्वंगु खँ धाःगु दु ।
चिकुलां स्यांजाया मिर्मीइ कालीगण्डकी 'ए' जलविद्युत केन्द्रया बाँध बन्द जुइगु जुयाः अप्वःसिया शव अन हे लुइगु खः। वर्षाय् धाःसा बाँधया फुक्कं लुखा चालीगु जुयाः अन शव लुइगु सम्भावना म्हो जक दुगु खँ प्रहरी निरीक्षक विजय पण्डितं कनादीगु दु। प्रहरीया लागिं निम्ह मस्तय् शव लूसा दकलय् बल्लाःगु प्रमाण जुइगु खः ।
अबुम्ह कृष्ण शर्मा तिवारीं निम्हं म्ह्याय्पिंत वंगु श्रावण १५ गते म्वाःम्वाकं हे पालंपाः मोदीखोलाय् मोटरेबल तां वांछ्वया बियागु खँ स्वीकार यायेधुंकूगु दु। अभियुक्त तिवारी विरुद्ध जिल्ला अदालतय् कर्तव्य ज्यान मुद्दा दायर यानाः कानुनी कारवाही न्ह्यःने न्ह्याके धुंकूगु दु ।
उखे म्ह्याय्पिंत अबुम्हेस्यां हे खुसिइ वांछ्वयाः स्याना बिउगु खँ न्यनेधुंकाः मस्तय् मांम्ह इजरायलं लिहां वयेगु तयारी यानाच्वंगु खँ सीदुगु दु। वंगु प्यदँ न्ह्यवंनिसें रोजगारीया लागिं इजरायलय् च्वनाच्वंम्ह मांम्ह राधिका तिवारी आः नेपाः लिहां वयेगु तयारी यानाच्वंगु खँ वया पासा सुभद्रा भण्डारीं सामाजिक सन्जाल फेश बुक मार्फत जानकारी बिउगु दु ।
चैत्रया निगूगु वालय् छेँय् वयाः वंगु जेठ २ गते तिनि इजरायल लिहां वंम्ह मांम्ह राधिका म्ह्याय्पिंत बांलाःगु शिक्षा बी फयेमा धकाः हे कमे यायेगु ताः तयाः भाःतयात छेँय् तयाः थः ज्या यायेत इजरायल वंम्ह खः ।
