आः शान्ति प्रक्रिया न्ह्याः वनी हे मखुत?

अन्ततः प्रधानमन्त्री झलनाथ खनालं राजीनामा हे बीगु निर्णय यानादीगु दु। वंगु श्रावण २८ गते हे राजीनामा बीगु धकाः वय्कलं घोषणा यानादीगु खःसां राजीनामा मबिउसां जीगु छुं उपाय लुइके फइ ला धकाः कुतः यानाच्वँच्वं हे निन्हु ताःहाकः जूवन। तर राजीनामा बीगु म्याद निन्हु ताःहाकः जूसां वय्कलं राजीनामा बियादी धइगु खँय् मेगु दलत धाःसा ढुक्क धइथें दुगु खः ।

प्रम खनालं राजीनामा बियादीगुलिं वय्कःया विपक्षी दल व थःगु हे पार्टीया छुं नेतात ला लय् हे तायादिल जुइमाः। तर वय्कःया थ्व राजीनामां छगू गम्भीर न्ह्यसः धाःसा सकस्यां धाःसा थना बिउगु दु। प्रम खनालं यदि शान्ति प्रक्रिया व संविधान च्वयेगु ज्याय् छुं प्रगति मजुल धाःसा थम्हं राजीनामा बी धयादीगु खः। थुकिया अर्थ शान्ति प्रक्रिया व संविधान च्वयेगु ज्याय् छुं हे कथंया ठोस प्रगति मजूगु जुल। प्रधानमन्त्रीं थपाय्च्वः ख्याच्वः हे बिलं नं ठोस प्रगति जुइ मफुगु शान्ति प्रक्रिया व संविधान च्वज्या आः मेपिं प्रधानमन्त्री जुइवं न्ह्याः वनी धकाः गय् यानाः विश्वास यायेगु? शान्ति प्रक्रिया व संविधान च्वयेज्या आः न्ह्याः वनी मखुत लाकि धइगु छगू तःधंगु शंका जन्म याना बिउगु दु प्रम खनालया राजीनामां। वय्कलं शान्ति प्रक्रियायात न्ह्याकेगु ज्याय् सफलता चूलाके मफयाः राजीनामा यानादीगु ला निश्चय नं खः, तर वय्कःया राजीनामां थ्व ज्याय् आः वइपिं मेपिं प्रधानमन्त्रीत नं सफल जुइगु सम्भावना मदु धइगु स्पष्ट सन्देश नं बिउगु दु। आःया इलय् दकलय् ग्यानापुगु खँ थ्व खः गुकियात दलतय्सं अझ नं ध्यान बिउगु खने मदु ।

More Stories Like this