लिबियाय् हाकनं तःधंगु ल्वापु न्ह्यात

महिनौ थुखे न्ह्याःगु आन्दोलनया दथुइ लिबियाया मुख्य शहरय् हाकनं तःधंगु ल्वापुत न्ह्याःगु दु । सरकारी सेना व विद्रोहीत दथुइ पश्चिमी लिबियन शहर जाबिया लगायत थासय् ल्वापु जूसां नं हताहती बारे छु नं जानकारी ब्यूगु मदु ।

उगु थाय् ट्युनिशियाया लिक्क लाः । विद्रोहीतय्सं जाबिया कब्जा यानागु घोषणा याःगु दु । तर सरकारं विद्रोहीया उगु धापूयात कयाः धाःसा खण्डन याःगु दु । सरकारी प्रवक्ता मौसा इब्राहिमं चीधंगु ल्याखय् दुपिं विद्रोहीतय्सं आन्दोलन न्ह्याकेत स्वःसां नं उमित तुरुन्त हे शहरपाखें ख्यानाः छ्वःगु जानकारी ब्यूगु खः ।

करीब न्यय्म्हसिया ल्याखय् दुपिं उमिसं सरकारी सेना विरुद्ध आक्रमण न्ह्याकेवं हे सेनां उमित ख्यानाः छ्वःगु जानकारी ब्यूगु खः । लिबियाय् शासक कर्णेल मुआमर गद्दाफी विरुद्ध विद्रोहीतय्सं आन्दोलन न्ह्याकूगु ताः ई बिइधुंकूगु दु । तर अनया सरकारं आन्दोलन थः जनतां स्वतः स्फूर्त मजुसे अमेरिका व युरोपया उक्साहटय् जुयाच्वंगु जानकारी ब्यूगु खः ।

गद्दाफी विरुद्ध उत्तर एटलान्टिक सन्धी संगठन नेटों आक्रमण न्ह्याकूसां नं आः नेटो ल्यूने लिचीले धुंकूगु जानकारी नं ब्यूगु खः ।

More Stories Like this