थौं यल देय् पूर्ण रुपं ठप्प
यल (सन्ध्या टाइम्स)/मय्जु रोजी महर्जनयात स्याःगु घटनाया विरोधय् ज्यापु समाज यलं थौं यल जिल्ला बन्द याःगुलिं जनजीवन प्रभावित जूगु दु। सुथंनिसें हे यलया ४० गू ज्यापु त्वाःया मस्त व ज्याथजिथि समेत पिहां वयाः बन्द याःगु दु। रोजी महर्जनयात स्याःपिंत कारवाही यायेमाःगु, शान्ति सुरक्षाया व्यवस्था यायेमाःगु माग यासें थन थौं सुथंनिसें हे थाय्थासं जुलुस पिकाःगु खः ।
द्वलंद्वः मनूतय्सं सतकय् च्वनाः प्रदर्शन यानाच्वंगु दुसा पसः, यातायात, कलकारखाना, शिक्षण संस्था बन्द दु। बन्दकर्तात यलय् दुहां वनेगु मूमू नाका बल्खुया सानेपा, सातदोबाटो, मनहरा ताँ, कोटेश्वर लगायतया थासय् प्रदर्शन यानाच्वंगु दु। प्रदर्शनकारीतय्सं न्हिनय् १२ बजे तक खुगः न्हय्गः गाडी तोडफोड यायेधुंकूगु दु। ट्राफिकं बिउगु जानकारी कथं सातदोबाटोय् बा. २ च ४५५९ नम्बरया कार, वादे मोडय् बा. ९ प ७४१३ नम्बरया मोटरसाइकल, एकान्तकुनाय् बा. २ ख ४६७६ नम्बरया बस, नखु दुवातय् ना. ३ ख २९८२ नम्बरया बस व बा. २ ख ७७६ नम्बर बस तोडफोड याःगु खः ।
अथे हे गाबाहालय् छगः मोटरसाइकल तोडफोड याःगु दुसा मानभवन व एकान्तकुना लागाय् स्वंगुलिं मल्याक पसः नं तोडफोड याना बिउगु दु। यलध्वाखा लागाय् ठेलागाडा बेथां बेथां दिकाः लँ पनातःगु दु। ज्यापु समाज यलं थौं सनिलया ५ बजे तक बन्द आह्वान याःगु खः ।
थ्वहे झ्वलय् नेवाः जागरण मञ्चपाखें संयोजक सुजीव वज्राचार्य व नेपाल लोकतान्त्रिक नेवाः संघपाखें नायः सानुराजा शाक्यं अलग अलग वक्तव्य पिकासें मय्जु रोजी महर्जनया हत्याया विरोध व बन्दया समर्थन याःगु दु ।
