कांग्रेसया ब्राम्हणवादी राज्य पुनर्संरचना

श्रीकृष्ण महर्जनपाखें

येँ/नेपाली कांग्रेसय् सहलह जुयाच्वंगु राज्य पुनर्संरचनाया प्रस्ताव पहिचान व सामर्थ्यया आधारय् धाःसां वास्तवय् उगु प्रस्ताव पहिचान समाप्त यायेगु डिजाइन कथं वःगु खनेदु। उकी प्रस्तावित न्हय्गू प्रदेश मध्ये न्यागू प्रदेशय् ब्रम्हू क्षेत्रीया बाहुल्यता क्यना तःगु दु ।

उगु प्रस्तावय् उल्लेख जुयाच्वंगु कर्णाली प्रदेशय् राज्य पुनर्संरचना तथा राज्य शक्ति बाँडफाँट समितिं न्हापा यानातःगु १४ प्रदेशया प्रस्तावयात हे स्यंकाः खप्तड, कर्णाली, जडान व थारू क्षेत्रया पश्चिमी भाग स्वाकातःगु दु। उगु प्रदेशया २४ लाख ११ द्वः जनसंख्या मध्ये ब्रम्हू क्षेत्री १५ लाख ६० द्वः, दलित २ लाख ३७ द्वः, मगः १ लाख १५ द्वः क्यनातःगु दु ।

अथे हे तमुवान व मगरात स्वानाः दयेकातःगु गण्डकी प्रदेशय् १५ लाख ९६ द्वः जनसंख्या दुसा उकी ब्रम्हू क्षेत्री ८ लाख ७६ द्वः, दलित ७ लाख ८६ द्वः व मगः ५ लाख ३३ द्वः क्यनातःगु दु। अथे हे सगरमाथा प्रदेशय् ताम्सालिङ, सुनकोशी, नारायणी व शेर्पायात दुथ्याकातःगु दु। उगु प्रदेशया ३० लाख २० द्वः जनसंख्या मध्ये ब्रम्हू क्षेत्री १० लाख ३६ द्वः, तामाङ ८ लाख १८ द्वः, नेवाः २ लाख ६४ द्वः क्यनातःगु खने दु ।

नेवाःतय् बाहुल्यता दुगु स्वनिगः समेत दुथ्याकाः दयेकातःगु राजधानी प्रदेशया १६ लाख २४ द्वः जनसंख्या मध्ये ब्रम्हू क्षेत्री ६ लाख १२ द्वः, नेवाः ५ लाख ८० द्वः व तामाङ १ लाख ४४ द्वः क्यनातःगु दु ।

उकथं हे सिरीजंगा प्रदेशय् किराँत, लिम्बुवान व कोचिला दुथ्याकातःगु दु अनया ३९ लाख ६६ हजार जनसंख्याय् ब्रम्हू क्षेत्री ११ लाख १४ द्वः, राई ५ लाख ४५ द्वः व लिम्बू ३ लाख ४१ द्वः क्यनातःगु दु। अथे हे सिम्रौनगढ (जनकपुर) प्रदेशया ४६ लाख १४ द्वः जनसंख्याय् २३ लाख ३९ द्वः, मैथिली, ११ लाख ४२ द्वः भोजपुरी व ३ लाख ८० द्वः ब्रम्हू क्षेत्री क्यनातःगु दु। अथे हे लुम्बिनी भावर प्रदेशया ३२ लाख २९ द्वः जनसंख्याय् ८ लाख ५९ द्वः थारु, ७ लाख ७० द्वः ब्रम्हू क्षेत्री व २ लाख ७७ द्वः मुस्मां क्यनातःगु दु ।

कांग्रेसं ब्रम्हू क्षेत्र बाहुल्य जुइ कथं प्रदेश निर्माण यानाः न्हय्गू मध्ये न्यागुली जनजातियात अल्पमतय् लाकातःगु दु ।