सिकालीयात दां अभाव
येँ (सन्ध्या टाइम्स)/थुगुसी खोनाय् जुइगु सिकाली (रुद्रायणी देवी) या झिंनिदँया जात्रा न्यायेकेगु लागिं छखे व्यापक तयारी जुयाच्वंगु दुसां मेखे उगु जात्रायात माःगु खर्च चूलाके मफयाः ग्वसाः खलःयात उलि हे मर्का नं जुयाच्वंगु दु। झिंनिदँय् छक्वः थ्व जात्रा दछियंकं हे न्यायेकेमाः। थुकिया निंतिं थुगुसी ३३ लाख ३७ द्वः ४५६ तकाया बजेट पिहां वःगु दु। तर सरकारं धाःसा ५ लाख जक बी धाःगु दु। बाँकी दां म्हये मफुत धाःसा जात्रा न्ह्याके मफयेफुगु खँ गुथिया नायः शरणगोपाल महर्जनं म्हिगः याःगु पत्रकार सम्मेलनय् कनादिल। पत्रकार सम्मेलनय् जात्राय् प्याखं हुलीपिं द्यःपिं थःपिनि परम्परागत वसतय् हे वयाः जात्रा व थुकिया समस्या बारे कनादीगु खः।
थ्व जात्राया झ्वलय् खोनाय् लछियंकं म्वः तकं ल्हुइ मजिउगु, ख्यें नये मजिउ, व्याहाः, बाःर्हा तकं तये मजिउगु नियम दु ।
