हत्या विरुद्ध छप्पँ जुइत इनाप

यल (सन्ध्या टाइम्स)/ थनया तःननी त्वालय् च्वंम्ह भाजु गोविन्द महर्जनया म्ह्याय्मय्जु रोजी महर्जनयात वंगु शुक्रवाः अपहरण यानाः स्याःगु खँयात कयाः ज्यापु समाज यलं छगू वक्तव्य पिकासें कडा भर्त्सना याःगु दु। मदुम्ह महर्जन धोबिघाटस्थित नेपाल कलेज अफ म्यानेजमेन्टय् अध्ययन यानाच्वंम्ह खः। वय्कःयात वंगु श्रावण २० गते अपहरणकारीतय्सं धोबिघाटस्थित कलेजं नाटकीय ढंगं अपहरण यानाः यलया नल्लु गाविसया जंगलय् यंकाः निर्मम ढंगं स्याःगु खँ वक्तव्यय् धयातःगु दु ।

वंगु श्रावण २४ गते मय्जु रोजी महर्जनया लाश टिचिङ्ग अस्पताल महाराजगञ्जय् पोष्टमार्टम यासें बहनी शंखमूलय् दाहसंस्कार याःगु खः। ताः ई न्ह्यवंनिसें देशय् निर्दोष जनताया अपहरण, हत्या, हिंसा व अपराधया घटनात जुयाच्वंगुलिं थज्याःगु घटनाप्रति राज्य व सरकार, सम्पूर्ण राजनितिक दलया नेतृत्ववर्ग एवं सुरक्षा निकायया उच्च अधिकारीतय् ध्यानाकर्षण यासें सम्पूर्ण नेपाःमिया जीउ धनया सुरक्षाया प्रत्याभूति यायेत नं समाजं माग याःगु दु ।

उगु हत्याय् ल्हाः दुपिं हत्यारा व अपहरणकारीतय्त राज्यं हदै तकया कडा कारवाही यायेत नं ज्यापु समाजं माग याःगु दु। थ्वहे झ्वलय् ज्यापु समाज यलया ४० त्वाःया सकलें दुजःत, नटोल, त्यागः व क्वय्लाछीइ उपस्थित जुयाः थौं शुक्रवाः कुन्हु यायेत्यंगु विशाल जनशक्ति प्रदर्शनय् ब्वति कायेत नं इनाप याःगु दु। लिसें वकुन्हु यलदेय् बन्दया समेत आह्वान यासें उगु अपहरण व हत्याकाण्डया विरोधय् जुइगु प्रदर्शनय् सकलें संघसंस्था व न्यायप्रेमी जनसमुदायं ऐक्यवद्धता क्यनेत नं समाजं दुनुगलं निसें इनाप याःगु दु ।