च्वछायेबहःगु जू उर्जामन्त्रीया साहस

उर्जामन्त्री गोकर्ण बिष्टं मतया ध्यबा मपुलीपिं सरकारी ज्याकूतय्गु मतया लाइन बन्द यानाः छगू साहसिक पलाः ल्ह्वनादीगु दु। थीथी मन्त्रालय व आयोगं मत च्याकाः मपूगु ध्यबा जक हे थौंकन्हय् छगू अर्ब धइथें थ्यनेत्यंगु दु। जनतां ध्यबा मपूसा तुरुन्त हे लाइन काटे यायेगु तर सरकारया निकायं ध्यबा मपूसा चाहिं छुट बीगु जुइ मखु धासें वय्कलं थः हे सक्रिय जुयाः मतया लाइन चायेगु ज्या न्ह्याकादीगु खः। वय्कःया थ्व ज्या धाथें नं च्वछायेबहः जू। मतया ध्यबा पुलेगु लागिं सरकारी निकायतय्के ध्यबा हे मदुगु मखु। तर उमिसं उगु ध्यबायात मेमेथाय् छ्यलाः मतया ध्यबा धइगु पुले हे म्वाः थें तायेकी। सखे मन्त्रालयतय्सं ध्यबा पुलेम्वाः थें तायेकाच्वंगुलिं नं जुइफु, अज्याःगु सरकारी ज्याकुथी कर्मचारीतय्पाखें मतया दुरुपयोग नं जुयाच्वंगु दु। यदि ध्यबा पुलेमाःगु अवस्था वल धाःसा अज्याःगु दुरुपयोगयात पनेगु ज्या नं स्वतः हे जू वनी ।

छुं जुयाः फुक्कं सरकारी ज्याकूतय्सं नियमित रुपं मतया ध्यबा जक पुला बिल धाःसां विद्युत प्राधिकरणयात ज्या यायेत यक्व हे छिनीगु खः। छगू अर्ब तका धइगु छगू चीधंगु जलविद्युत परियोजना हे सुरु यायेत गाःगु दां खः।
उर्जामन्त्रीं साहस यानाः ल्ह्वंगु थ्व पलाःयात मेपिं नं सकस्यां ग्वाहालि याये माःगु आवश्यकता दु। थौंकन्हय् लोश-शेडिंगं यानाः गुगु मार देशं फये मालाच्वंगु खः, यदि सकलें सरकारी ज्याकूतय्सं मत च्याकूगु ध्यबा पुल धाःसा उगु लोडशेडिङ तक नं छुं भचा चीकेत तिबः जूवनी। उकिं नं लोडशेडिङं यानाः कष्टय् लानाच्वंपिंसं उर्जामन्त्रीं ल्ह्वंगु थ्व ज्यायात ग्वाहालि याये हे माः ।

More Stories Like this