राज्य पुनःसंरचना सम्बन्धय् लोकतान्त्रिक नेवाः दबूया सरोकार

दस्तावेज
नेपाली काँग्रेस दुने सहलह जूकथं स्वनिगः व थ्वया जःखःया लागा कःघानाः "राजधानी प्रदेश" दयेकेगु धकाः वःगु प्रस्तावया सम्बन्धय् नेपाली काँग्रेसलिसे आबद्ध जिपिं लोकतान्त्रिक नेवाःतय्गु संस्था लोकतान्त्रिक नेवाः दबू जक मखुसें सकल नेवाः समुदाय हे दुःखी जूगु दु। उकिं मिति २०६८ श्रावण २३ गते सोमवाः कुन्हु च्वंगु थुगु लोकतान्त्रिक नेवाः दबूया अधिवेशनं नेपाली काँग्रेसं न्ह्यब्वःगु प्रस्ताव संविधानसभाया राज्य पुनः संरचना व राज्यशक्तिया बाँडफँड समितिया प्रारम्भिक अवधारणाय् सहमत जूगु पहिचान व सामर्थ्यया आधारय् राज्य पुनः संरचना मजुइगु जुयाः उगु "राजधानी प्रदेश" जिपिं नेपाली काँग्रेसलिसे आबद्ध नेवाः वर्ग व थुगु लोकतान्त्रिक नेवाः दबूयात स्वीकार मजूगु सर्वसम्मतं निर्णय जूगु खँ अवगत यासें विशेषत राज्य पुनः संरचनाया सम्बन्धय् थुगु दबूया सरोकार दुगु मुद्दात थुकथं दुगु व थ्व प्रति विशेष संवेदनशील जुयादीत विशेष इनाप नं यानाच्वना ।

१) भाषा, संस्कृति, जाति पहिचान व सामर्थ्यया आधारय् स्वशासन, आत्मनिर्णयया अधिकार सहितया नेवाः स्वायत्त राज्यया सुनिश्चितता दयेमाः ।
२) धर्म निरपेक्षता, स्वतन्त्र न्यायपालिका, अन्तर्राष्ट्रिय मानव अधिकारया मूल्य व मान्यता अतिरिक्त अन्तर्राष्ट्रिय श्रम संगठन महासन्धी १६९ व आदिवासी अधिकार (undrip) प्रत्याभूत अधिकार दयेमाः ।
३) राष्ट्र निर्माणय् निरन्तर रुपं विशिष्ट योगदान बिया वयाच्वंगु नेवाः समुदायया प्रादेशिक, सांस्कृतिक, भाषिक रुपय् आदिकालंनिसें थःगु स्वतन्त्र पहिचान दुगु व इतिहासय् गरिमा व मर्यादाया सम्मान यासें नेवाः समुदायया निंतिं उमिगु पहिचान कायम जुइ कथं नेवाः स्वायत्त राज्य नेपालमण्डल राज्य सुनिश्चित जुइमाः ।
४) लिसें स्वनिगः व थ्वया लिक्क लाःगु छुं लागा कःघानाः राजधानी प्रदेशया रुपय् प्रदेश दयेकेगु प्रस्ताव सकल नेवाः समुदायया पहिचान प्रतिया सम्मान मयाःगु व उमिगु गरिमामय इतिहासया अवमूल्यन खः धइगु ठहर यासें उगु प्रस्ताव जिमित पूर्ण अमान्य जूगु दु ।
५) राज्य पुनः संरचना व बाँडफाँड समितिपाखें प्रस्तावित नेवाः प्रदेशया प्रादेशिक भूमि अनया जनघनत्व, संस्कृति, भाषिक, वातावरण व ऐतिहासिक तथ्यया आधारय् नं चीधं व अव्यावहारिक जू। उकिया प्रादेशिक सीमा नेवाःतय्गु ऐतिहासिक व निरन्तरताया आधारय् विस्तारित यायेमाः ।
६) नेवाः राज्य (नेपाल मण्डल) गुगुं छगू राज्यवेष्ठित जुइ मजिउ। संविधानसभा दुनेया प्रमुख दलमध्येया छगू नेपाली काँग्रेस लोकतान्त्रिक पार्टी जूगुलिं छिकपिंपाखें च्वय् न्ह्यब्वयागु जिमिगु अवधारणायात मनन् यासें उगु प्रस्ताव पारित मयासे थुगु लोकतान्त्रिक नेवाः दबुलिं विशेष इनाप यानाच्वना। छिकपिनिगु समर्थन व ग्वाहालिया निंतिं जिपिं सकल लोकतान्त्रवादी नेवाः समुदाय व लाकतान्त्रिक नेवाः दबू न्ह्याबलें थें हे आशावादी जुयाच्वनागु दु। ग्वाहालिया निंतिं सुभाय्। जय नेपाल !

गजेन्द्रमान मानन्धर
अध्यक्ष
लोकतान्त्रिक नेवाः दबू, नेपाः ।

More Stories Like this