कन्हय् यल बन्दया आह्वान

यल (सन्ध्या टाइम्स)/डेटिङय् वंम्ह २१ दँया रोजी महर्जनयात वया थःहे मतिनामिं गोलीं कयेकाः स्याना बिउगु विरोधय् ज्यापु समाज यलपाखें कन्हय् यल देय् बन्दया आह्वान याःगु दु। यलया सिमपानी भञ्ज्याङया जंगलय् रोजीया लाश लुइकूगु खः ।

कन्हय् यलया नःत्वाः, त्यागः व च्यासः लागां ब्यागलं ब्यागलं जुलुस पिकयाः हत्या विरुद्ध प्रदर्शन यायेगु खँ ज्यापु समाजं धाःगु दु। हत्यारायात कारवाही यायेमाःगु, शान्ति सुरक्षाया व्यवस्था यायेमाःगु माग यासें उगु बन्द आह्वान याःगु खः। यलया नेवाः म्ह्याय्मचायात अपहरण यानाः जंगलय् गोलीं कयेकाः स्याना बिउगु समाचार सार्वजनिक जुइवं ज्यापु समाज यलं म्हिगः हे आकस्मिक बैठक च्वनाः घटनाया विरोधय् सतकय् कुहां वयेगु निर्णय याःगु खः ।

थ्व झ्वलय् थौं सुथय् कोपुण्डोल लागाय् स्थानीय मनूतय्सं चक्का जाम याःगु दुसा जुलुस नं पिकाःगु दु। मदुम्ह रोजी कुपण्डोलया ज्वागलय् च्वंम्ह खः। रोजीयात वया थःहे मतिनामि धाःम्ह सुभाष उप्रेतीं गोलीं कयेकाः स्यानागु स्वीकार यायेधुंकूगु दु। उगु घटनाय् स्वापू दुपिं सचित खड्का व हुसेन राईयात नं प्रहरीं ज्वनेधुंकूगु दुसा कुमार तामाङ व कत्ले धाइम्ह राज लोहार धाःसा बिसिउँ वनाच्वंगु दु। प्रहरीं उप्रेतीं धाःगु चापागाउँ लागां १७ किलो मिटर तापाक्क च्वंगु झाडी दुने रोजीया सीम्ह लुइकूगु खः। उगु घटनाया योजनाकार सुभाषं राजु व कुमारयात ध्यबा बियाः गोलीं कयेके बिउगु खँ सीदुगु दु ।

घटनाय् छ्यःगु पेस्तोल कुमारं हःगु खःसा राजुं गोलीं कयेकुगु खः। इपिं निम्हं आः बिसिउँ वनाच्वंगु दु। रोजीयात स्यायेगु लागिं सुभाषं उमित १ लाख ७५ द्वः दां बीगु सम्झौता याःगु खःसा वंगु असोज १८ गते न्हापांगु किस्ता कथं नीन्याद्वः बिउगु खः। रोजीयात स्यायेधुंकाः उमिसं रोजीया दाजुयात एसएमएस यानाः ३० लाख तका फिरौती माग याःगु खः। रोजीया पासापिंसं बिउगु सुचंया आधारय् शुक्रवाः हे प्रहरीं सुभाषयात ज्वंगु खःसा न्हापा छुं मसिउ धयाच्वंम्ह सुभाषं लिपा अपराध स्वीकार याःगु खः ।