लुँ तोलां बागू लाख पुल !
येँ (सन्ध्या टाइम्स)/वंगु छुं न्हि न्ह्यवंनिसें अस्थिर जुयाच्वंगु लुँयागु भाः थौं झन हे थहां वनाः प्रति तोला बागू लाखं च्वय् थ्यंगु दु। थौंया बजारय् लुँयागु भाः तोलां ५०,५०० तका कायम जूगु दु। नेपाःया इतिहासय् लुँयागु भाः थुलि च्वय् थ्यंगु थ्वहे न्हापांखुसी खः। म्हिगःया भावय् तोलां करिब निद्वः थहां वनाः थौं थुलि उच्च भाः कायम जूगु खः ।
नेपाल सुनचाँदी व्यवसायी संघया नायः तेजरत्न शाक्यं लुँयागु भावय् जुयाच्वंगु थ्व थहांकुहांयात 'तसकं असामान्य' स्थिति धयादीगु दु। बजाः असामान्य जूगुलिं थ्व भाः थथे हे जुइ धाये मफु धासें वय्कलं कनादिल, 'जिं स्वयेबलय् थ्व भाः कुहां वयेफुगु नं स्थिति दु। उकुन्हु वहःया भाः नं छक्वः थहां वनेधुंकाः हानं कुहां वःगु खः।'
अमेरिकी आर्थिक मन्दीया लिच्वः कथं शेयरय् लगानी यायेत मनूत अझ नं ग्यानाच्वंगु कारणं लुँ न्यायेगु अप्वया वंगुलिं भाः थहां वंगु वय्कःया विश्लेषण दु। अमेरिकी रिजर्भ बैंकं आर्थिक स्थिति सुधार यायेत छुं हे पलाः मल्ह्वंगुलिं शेयरय् लगानी यायेत मनूत अझ नं ग्यानाच्वंगु दनि ।
अन्तर्राष्ट्रिय बजारय् लुँयागु भाः थहां वंगुलिं नेपाःया सरकार धाःसा छु यायेगु धकाः हे धाये मफुगु अवस्थाय् लानाच्वंगु खँ नं नायः शाक्यं कनादिल। भाः थहां वंगुलिं शेयर मियाः लुँ न्याइपिं अप्वयाच्वंगु दुसां सरकारं माक्व लुँ पित बी फयाच्वंगु मदु ।
उखे स्थानीय लुँवहः व्यवसायीत धाःसा थ्व सिजनया इलय् नं लुँया ज्या याये मखंकाः च्वने मालाच्वंगु दु। भाः थहां वंगुलिं खुद्रा लुँ मिउ वइपिं अप्वयाः नं स्थानीय व्यवसायीत प्रभावित जुयाच्वंगु दु ।
