कांग्रेस नेता स्याना बिल
येँ (सन्ध्या टाइम्स)/सुनसरीया सिगिया गाविसय् वंगु चान्हय् नेपाली कांग्रेसया स्थानीय नेतायात स्याना बिउगु दु। सिगियाया पत्थरदेवा धइगु थासय् थःहे जःलाखःलां गाविसया कांग्रेस सभापति कल्याणविक्रम थापा (३६ दँ) यात स्याना बिउगु खः ।
थापायात ६५ दँ दुम्ह रत्न बहादुर भण्डारीं चान्हय् खुकुरीं पालाः स्याना बिउगु खँ इलाका प्रहरी पकलीया प्रहरी निरिक्षक बिपीन गौतमं कनादीगु दु। खुकुरीं पालाः तुतिइ घाः जूम्ह थापायात वासः याकेत यंकूगु खःसा अप्वः हि बाः वनाः वयागु मृत्यु जूगु खँ वीपी कोइराला स्वास्थ्य विज्ञान प्रतिष्ठान धरानं धाःगु दु ।
थापायात स्याःम्ह भण्डारीयात प्रहरीं चान्हय् हे छेँय् च्वनाच्वंगु अवस्थाय् ज्वंगु दु। पुलांगु रिसिइबीया कारणं भण्डारीं थापायात स्याःगु अनुमान दु ।
