राजीनामा बिया वनेगु प्रधानमन्त्रीया प्रतिवद्धता
प्रधानमन्त्री झलनाथ खनालं अन्ततः यदि कंस श्रावण २८ गते तकया दुने नं माओवादीपाखें शान्ति प्रक्रिया न्ह्याकेगु लागिं छुं कथंया पहल मयात धाःसा थम्हं राजीनामा बिया वनेगु जुइ धकाः सदनय् लिखित प्रतिवद्धता प्वंकादीगु दु। वय्कलं बियादीगु उगु प्रतिवद्धतायात आःया निंतिं राजीनामा सरह धकाः हे थुइकूसां जिउ। छाय्धाःसां प्रम खनालपाखें उगु लिखित प्रतिवद्धता वयेवं छखे नेपाली कांग्रेस दुने सरकारया नेतृत्व कायेगु चलखेल सुरु जुइ धुंकूगु दुसा उकिया नापनापं माओवादी दुने नं प्रधानमन्त्री कथं प्रस्तावित उपाध्यक्ष डा. बाबुराम भट्टराईनं मनूत नापलानाः थःगु तयारीयात तीव्र रुपं ब्वाकेधुंकूगु दु। वय्कःपिनि तयारी स्वयेबलय् प्रम खनालया राजीनामा आः निश्चित धकाः थुइकूसां जिउ। अले खनालया राजीनामा निश्चित धाःगुया अर्थ माओवादीं श्रावण २८ गते न्ह्यः शान्ति प्रक्रियायात न्ह्यःने यंकेगु लागिं छुं ज्या याइ मखु नं धाःगु जुल। यदि शान्ति प्रक्रियाया सवालय् माओवादीया पलाः थथे सुस्त जुयाच्वनेगु खःसा खनालया राजीनामा लिपा नं देशं शान्ति व संविधान काये खनी धकाः आशा यायेगु थाय् अझ नं मदुनि धकाः हे थुइके माःगु जुइ ।
खनालया राजीनामा लिपा न्हूम्ह प्रधानमन्त्री सु जुइ व सरकार गय् यानाः न्ह्याइ धइगु खँ आः तकं निश्चित मजूनि। उकिं वय्कःया राजीनामा वयेवं सरकार गठन यायेगु ज्याय् हानं छक्वः देशया महत्वपूर्ण ई सितिकं वनीगु निश्चित दु। थुकिया अर्थ शान्ति व संविधानया निंतिं भदौ १४ गते तक बियातःगु समय सीमा नं अर्थहिन जुइगु पक्का जुल ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
