गुंपुन्हि व सिलु मेला

लव कर्माचार्य

दछियंकं वइगु झिंनिगू पुन्हि मध्ये 'गुंपुन्हि' नं छगू खः। थुकुन्हु गुता बूबः फ्वयाः क्वाति नं त्वनीगु जुयाः थुकुन्हुयात क्वाति पुन्हि नं धायेगु याः। गुंपुन्हिया तप्यंक स्वापू नेवाःतलिसे दु। नेवाःत दुने नं अप्वः धइथें कृषकत हे खनेदु। कृषकत धइपिं बुँइ ज्या याइपिं खः। थःगु बुँ बालीया रक्षा याइम्ह ब्यांयात नं थुकुन्हु हे जा नकेगु याइ। उकिं थुकुन्हुयात ब्यांजा नके पुन्हि नं धायेगु याः। गुंपुन्हि धयागु साउन क्वचाइगु व भाद्र सुरु जुइगु पुन्हि खः। उकिं थुगु पुन्हियात भाद्र पुन्हि धकाः नं धायेगु याः। गुंपुन्हि कुन्हु मनूतय् ल्हातय् जनै चीगु चलन दु। थुकुन्हु ल्हातय् चिउगु जनै सापुजा कुन्हु साया न्हिपनय् चिकेगु याइ। साया लिउलिउ थुगु जनैका ज्वनाः मनूतय्सं सीधुंकाः बैकुण्ठ तरे जुइ फइ धयागु विश्वास अझ नं दनि। खँय्तय् धाःसा थुकुन्हु शुद्ध जुयाः म्हय् नं जनै चीगु याइ। खँय्तय् थः शुद्ध जातियाम्ह खः धकाः ब्वयेगु छगू चिं इमिगु म्हय् च्वंगु जनै नं खः ।

थुगु पुन्हियात रक्षा बन्धन, ऋषि तर्पणी नं धायेगु याः। गुंपुन्हि तःन्हु न्ह्यवंनिसें पसः, पसः पतिकं बूबः मियातःगु खने दइ। पसः पतिकं मियातःगु क्वाति व तराईया व्यापारीतय्सं थीथी रंगया ल्हातय् चीगु का खनीबलय् गुंपुन्हि थ्यन धकाः मनूतय् ध्यान वनी। पुन्हि कुन्हु पशुपति गौरीतीर्थ, आर्य तीर्थ, पञ्चनारी, टेकु तीर्थ (दोभान), लुति, संखमूलया बासिन्दात थ्यनाच्वनी। थुकुन्हु हनुमान घाट, मंगल घाट, ख्वप बासिन्दापिं थीथी तीर्थय् थ्यनाच्वनी। ताहाचः, कालिमाटीया बासिन्दा टंकेश्वरय् थ्यनाच्वनी। थीथी तीर्थय् म्वःल्हुयाः शुद्ध जुइ धुंकाः ब्रम्हूया ल्हातं जनै चीगु ज्या जुइ। थुबलय् छेँया नायः वा नकिं ब्रम्हूतय्त थःथःगु छेँय् सःताः थः पितृया नामय् छुचुं व क्वाति सिदा बीगु याइ। क्वाति पुन्हि धाइगु हुनिं गुंपुन्हि कुन्हु सकसियां छेँय्छेँय् क्वाति व छुचुं मरि नयाः थुगु हनेगु याइ। गुंपुन्हिबलय् गुता बूबःया क्वाति गुक्वः त्वनाः गुजु वसः पुनाः गुक्वः तक बहाःबही स्वः वनेमाः धयागु न्हापायापिं मनूतय् धापू दु ।

स्वनिगलय् गुंपुन्हि थुकथं हनीगु खःसा तराई लागाय् केहेँपिंसं दाजु-किजापिंत राखी चिकाः सिन्हः तिकाः थुगु नखः हनी। झी नेवाःतय्सं किजा पुजा याये थें हे इमिसं गुंपुन्हिबलय् दाजु-किजापिंत राखी चिकेगु याइ। उगु राखीं दाजु-किजाया रक्षा याइ धयागु जनविश्वास नं दु।
गुंपुन्हि छगू नखः जक मखु थुकुन्हु तापाक्क व सतिक थीथी तीर्थय् मेला नं जुयाच्वनी। स्वनिगः दुने व पिने, बागमती अञ्चल दुने उत्तर दिशाया रसुवा जिल्लाय् लाःगु सिलु कुण्ड (गोसाइँ कुण्ड) य् गुंपुन्हि कुन्हु हे मेला जुयाच्वनी ।

अथे हे स्वनिगःया पूर्व सक्वं उत्तरपूर्व कुनय् लाःगु मणिचूड दहया मेला नं थुकुन्हु हे जुयाच्वनी। मणिमती (मनहरा) खुसि मणिचूड दहं न्ह्यानाच्वनी। अथे हे स्वनिगःया पूर्वपाखे लाःगु कालीघाट मेला नं गुंपुन्हि कुन्हु हे न्ह्याइगु खः। थुकिया लिसें यलया क्वन्ति त्वाःया क्वन्ति कुण्डया मेला व कुम्भेश्वर महाद्यःया मेला नं थुकुन्हु हे जुइगु खः ।

More Stories Like this