नेवाः कांग्रेसतपाखें पार्टीयात ६ बुँदाया पौ

श्रीकृष्ण महर्जन

नेपाली कांग्रेस दुने नेवाः प्रदेशयात राजधानी प्रदेश यायेगु धकाः प्रस्ताव हयाः सहलह ब्याकाच्वंगु इलय् नेपाली कांग्रेसया नेवाः कार्यकर्तातय्सं दयेकातःगु लोकतान्त्रिक नेवाः दबूपाखें म्हिगः बुधवाः राजधानी प्रदेशयात अस्वीकार यानाः नेवाः स्वायत्त प्रदेश नेपाल मण्डलया नितिं ६ बुँदाया पौ ब्यूगु दु । दबूया नायः गजेन्द्र मानन्धरं ल्हाःचिं तयाः कांग्रेस पार्टीया सभापति सुशील कोइरालाया नामय् ब्यूगु पतिइ थुकथं न्ह्यथनातःगु दु ः १) भाषा, संस्कृति, जाति, पहिचान व सामथ्र्यताया आधारय् स्वशासन, अत्मनिर्णयया अधिकार सहितया नेवाः स्वायत्त राज्यया सुनिश्चितता यायेमाःगु, २) धर्म निरपेक्षता, स्वतन्त्र न्यायपालिका, अन्तर्राष्ट्रिय मानवअधिकारया मूल्य व मान्यता नापं अन्तर्राष्ट्रिय श्रम संगठन आइ एल ओ १६९ नापं आदिवसीतय्गु अन्तर्राष्ट्रिय अधिकार प्रत्याभूति जुइमाःगु, ३) राष्ट्र निर्माणय् निरन्तर रुपं विशिष्ट योगदान यानाः वयाच्वंगु नेवाः समुदायया प्रादेशिक, सांस्कृतिक, भाषिक रुपय् आदिकालंनिसें थःगु स्वतन्त्र पहिचान दयाच्वंगु इतिहासया गरिमा व मर्यादाया सम्मान यानाः नेवाः समुदायया नितिं इमिगु पहिचान कायम जुइगु कथं नेवाः स्वायत्त राज्य नेपाल मण्डल राज्य पुनर्संरचना यायेमाः, ४) स्वनिगः व जःखःया छुं लागा दुथ्याकाः राजधानी प्रदेशया रुपय् प्रदेश दयेकेगु प्रस्ताव फुक्क नेवाः समुदायया पहिचानप्रतिया सम्मान मयाःगु व इमिगु गरिमामय इतिहासया अवमूल्यण खः धकाः ठहर यानाः उगु प्रस्ताव जिमित पूर्ण रुपं अमान्य, ५) राज्य पुनर्संरचना नापं राज्यशक्ति बाँडफाँट समितिपाखें प्रस्तावित नेवाः प्रदेशया प्रादेशिक भूमि, थनया जनघनत्व, संस्कृति, भाषिक, वातावरण व ऐतिहासिक तथ्यया आधारय् चीधं जूगु व अब्यवहारिक खः । अज्वःगु प्रदेशय् नेवाःतय्गु ऐतिहासिकता व निरन्तरताया आधारय् विस्तार यायेमाः, ६) नेवाः स्वायत्त राज्य नेपाल मण्डल छुं छगू राज्यं घेरेयाना तःगु जुइ मज्यू ।

नेपाली कांग्रेसया केन्दीय ज्याकू सानेपाय् वनाः पार्टीया सभापतिया नामय् लःल्हाःगु उगु पतिइ लोकतान्त्रिक नेवाः दबू लोकतन्त्रय् विश्वास याइपिं नेपाली कांग्रेस नाप आबद्धपिं जूगु खँ न्ह्यथसें वंगु साउन २३ गतेया तःमुँज्यां हे निर्णय यानाः कांग्रेसय् प्रस्तावित राजधानी प्रदेशयात पूर्ण रुपं विरोध यानाः व नेवाः स्वायत्त राज्य नेपाल मण्डल जुइमाःगु माग तकं यानातःगु दु । उगु दबूपाखें नेपाली कांग्रेसया फुक्क हे केन्द्रीय दुजःतय्त तकं उगु पौ लःल्हाःगु दु ।