'राष्ट्रिय सहमतिया बांलाःगु अबसर’

लुम्बिनीया परियोजना चिनयागु जक मखु ; प्रचण्ड

येँ (झीगु स्वनिगः)

संविधानसभाया दक्ले तःधंगु दल एकीकृत नेकपा -माओवादी)या नायः पुष्पकमल दाहल प्रचण्डं राष्ट्रिय सहमतिया सरकार दयेकेगु नितिं बांलाःगु अवसर वःगु दु धकाः धयादीगु दु । बहुमतीय सरकारपाखें शान्ति व संविधानया प्रक्रिया पूवंकेफैगु अवस्था मदुगु इलय् आः सहमतिया सरकार हे दयेकेमाः धकाः धयादीगु दु ।

मलेसियाय् जूगु एसिया प्यासिफिक एक्सचेन्ज एण्ड कोअपरेसन फाएण्डेसन -एपेक) या सम्मेलनय ब्वति कयाः लिहां झायादीम्ह माओवादीया नायः प्रचण्डं म्हिगः बुधवाः त्रिभुवन अन्तर्राष्ट्रिय विमानस्थलय् संचारकर्मीतलिसे खँल्हासें अथे धयादीगु खः । वय्कलं धयादिल 'ंआः बहुमतीय सरकारं नेपालय् शान्ति प्रंक्रिया व संविधान निर्माण प्रक्रिया पूवंकेगु संभावना मन्त, स्वदँया अनुभवं थ्व हे क्यंगु दु । आः सहमतिया सरकार दयेकेगु नितिं छगू बांलाःगु अवसर वःगु दु । झलनाथ खनालं सहमति जुइवं १ मिनेत हे च्वनेमखु धयादीगु दु, सहमति जुइ धुनेवं साय्द वय्कः एक मिनेट हे च्वनादी मखु ।'

एपेकया सहअध्यक्ष तकं जुयादीम्ह नायः प्रचण्डं लुम्विनी विकास परियोजना चिनयागु जक धकाः चर्चा जुयाच्वंगु भ्रम खः धासे संचारकर्मीतय्त धयादिल 'चिनयागु जक मखु थाइल्याण्ड, दक्षिण कोरिया लगायतया देय्त नं संलग्न दु ।' लुम्विनी परियोजना संचालनया नितिं सरकार सहभागी मजुइकं पारदर्शी जुइमखु धयादिसें आःया अवस्थाय् लुम्विनी परियोजना संचालनया नितिं जःलाखःलाः देय् नापं विश्वभरीया संघ संस्था व समुदायया ग्वहालि कायेगु हे नेपाःया जीत जुइ धकाः नं स्पष्ट यानादीगु दु ।

लुम्विनीइ ३ अर्ब अमेरिकी डलरया परियोजना संचालन यायेगु तकं घोषणा याःगु दु । एपेकया सम्मेलनय्.वनाः एकीकृत माओवादीया विदेश विभाग प्रमुख कृष्णबहादुर महरा नं नापंतुं म्हिगः लिहां वःगु खःसा वय्कःपिं नाप नापं एपेकया प्रतिनिधि तकं नेपालय् वःगु दु । इमिसं नेपाःया सरकारलिसे सहलह ब्याकाः वनीगु जूगु दु ।