विद्रोहीत आतंककारी जूगु राष्ट्रपति असादया द्वपं

सिरियाया राष्ट्रपति बशार अल असादं विद्रोहलय् कुहांवःपिंत नरम व्यवहार मयाइगु स्पष्ट यानादिसें विद्रोहीत आतंककारी जूगु द्वपं नापं ब्यूगु दु ।

टर्कीया विदेशमन्त्री अहमद दाभोतोग्लुलिसे राजधानी दमास्कसय् जूगु नापलाये ज्याधुंकाः न्वंवानादिसें असादं देय्या स्थायित्व व जनताया सुरक्षाया निंतिं सेनां थःगु जिम्मेवारी निर्वाह याइगु धयादिल । नापं वय्कलं राजनीतिक सुधारप्रति धाःसा थः गम्भीर दुगु खँय् बः ब्यूगु दु ।

टर्कीया विदेशमन्त्रीं धाःसा सिरियाय् प्रदर्शनकारी विरुद्धया सैन्य कारबाही तुरुन्त पनेत इनाप याःगु दु । थ्व स्वयाः न्ह्यः सिरियाय् प्रदर्शनकारी विरुद्ध व्यापक दमन जूगु धासें साउदी अरब, बहराइन व कुबेतं थः राजदूत लित सःतेधुंकूगु दुसा टर्कीं नं थः राजदूत लित सःतेगु ख्याच्वः ब्यूगु खः ।

थुखे सिरियाली सेनां धाःसा प्रदर्शनकारी विरुद्धया कारबाही न्ह्याकाः च्वनेगु झ्वलय् याःगु लिपांगु कारबाहीसं स्वीम्ह स्वयाः आपालं मनूत सीगु दु । वंगु वाः हामा लगायतया शहरय् जक स्वसः सर्वसाधारण सीगु मानव अधिकारवादी संगठनतय्गु दाबी याःगु दु ।

सिरियाय् वंगु मार्च थुखे राष्ट्रपति असादया शासन विरुद्ध जुयाच्वंगु प्रदर्शनया झ्वलय् झिंन्यासः स्वयाः आपालं मनूत सीधुंकूगु दुसा द्वलंद्वः मनूतय्त ज्वनेधुंकूगु दु ।

More Stories Like this