लुम्बिनी योजना विरुद्ध भारतया पलाः
मधेसवादी नेतातय्त थना हइगु
येँ (सन्ध्या टाइम्स)/छगू चिनियाँ संस्थां संयुक्त राष्ट्र संघलिसे जानाः नेपाःया लुम्बिनी विकासया लागिं ३ अर्ब डलर खर्च यायेगु कथं हःगु योजनाया विरोधय् भारतं लुम्बिनी जःखः पकड दुगु मधेसवादी पार्टी व उकिया नेतातय्त सक्रिय याइगु सम्भावना खने दया वःगु दु ।
छुं जुयाः चीनं उगु योजना कथं लुम्बिनीइ ज्या सुरु यात धाःसा भारतया सिमानाय् हे च्वनाः भारतयात निगरानी तयेगु ज्या यायेफु धासें भारतं परोक्ष रुपं उगु योजनाया विरोध यानाच्वंगु दु। स्वयम् थःहे न्ह्यःने वयाः उकिया विरोध याये मछिंगु कारणं भारतं थःगु पक्षया सञ्चार माध्यम लगायत आः मधेसवादी दलतय्त छ्यलीगु सम्भावना दुगु खँ सूत्रं धाःगु दु। लुम्बिनी मधेश लागाय् लाःगु जुयाः मधेसवादी दलतय्गु स्वीकृति मकासे अन गुगुं नं देशं छुं नं कथंया निर्माणया ज्या याये दइ मखु धइगु खँ आः मधेसवादी दलतय्सं नवाना हयेफुगु जानकारी विज्ञ सूत्रं बिउगु दु। छगू भारतीय सञ्चार माध्यमय् न्ववासें तमलोपाया नेता ह्दयेष त्रिपाठीं उगु योजना विरुद्ध मधेसवादीत सक्रिय जुइफुगु संकेत बियादीधुंकूगु दु। आः नकतिनि हे भारतं पिहां वइगु अंग्रेजी न्हिपौ 'टाइम्स अफ इण्डिया'या अन लाइन संस्करणय् च्वयातःगु दु: थ्व योजना सुरु जुल धाःसा भारतया सीमाय् लाक्क हे ड्रागन (चीन) दं वइ ।
थ्वहे झ्वलय् उगु योजनाय् हस्ताक्षर याःगु संस्था एपेकया बैठकय् ब्वति कयाः थौं तिनि येँय् लिहां झाःम्ह माओवादी अध्यक्ष प्रचण्डं उगु योजनाय् चीन याकःचा जक मखुसें थीथी देशं लगानी यायेत्यंगु जानकारी बियादीगु दु ।
