दुर्घटनाय् प्यम्ह सित, २५ म्ह घाःपाः

येँ (सन्ध्या टाइम्स)/काभ्रेया होक्से गाविस वडा नं. ६ या चिसापानी लागाय् थौं सुथय् ट्रयाक्स जीप दुर्घटना जुयाः छम्ह मचा व स्वम्ह मिसापिं नापं यानाः प्यम्ह सीगु दुसा मेपिं २५ म्ह घाःपाः जूगु दु ।

काभ्रेया होक्सेलागां बनेपापाखे वनाच्वंगु बा. ४ च १३१५ नम्बरया जीप होक्सेया लँय् थ्यंमथ्यं ७०० मिटर क्वय् कुतुंवनाः दुर्घटना जूगु खः। उकी लानाः होक्से गाविस वडा नं. ९ या ३० दँ दुम्ह सीता थापा (चालकया कलाः), उगु हे गांया ५५ दँ दुम्ह दिल्लीमाया तामाङ, साठीघर गाविस वडा नं. ४० ला अञ्जु श्रेष्ठ घटनास्थलय् हे सीगु खँ काभ्रेया जिल्ला प्रहरी कार्यालयं धाःगु दु ।

उगु दुर्घटनाय् लानाः घाःपाः जूम्ह चालकया प्यदँ दुम्ह काय जेन थापा नं अस्पताल यंकाच्वँच्वं हे सीगु खः। दुर्घटनाय् लानाः घाःपाः जूपिं यात्रुतय्त धुलिखेल अस्पतालय् वासः यायेगु ज्या जुयाच्वंगु दु। गाडीइ ब्याक गियर तयेगु झ्वलय् उगु दुर्घटना जूगु खयेमाः धकाः प्रहरीं अनुमान याःगु दु। दुर्घटना जूगु जीपय् दुरु तयाहःगु खःसा उकी मुक्कं यानाः ३० म्ह यात्रु दुगु खः ।

ठक्कर नकाः निम्ह सित
ख्वपया जडिबूटी लागाय् पेप्सिकोलापाखे वनाच्वंगु बा. ३८ प ३६४८ नम्बरया मोटरसाइकलं ठक्कर नकाः काभ्रेय् छेँ जुयाः थौंकन्हय् जडिबूटी लागाय् च्वनाच्वंम्ह ७७ दँया आलोकपुरे तामाङ सीगु दु। दुर्घटनाय् लानाः घाःपाः जूम्ह तामाङयात काठमाण्डौं मेडिकल कलेज सिनामंगलय् वासः याके यंकूगु खःसा वंगु चान्हय् वयागु मृत्यु जूगु खः। अथे हे मोरङय् नं कारं ठक्कर नकाः घाःपाः जूम्ह तिलक काफ्ले सीगु दु ।