दबू व खलःपाखें कांग्रेस नेतातय्त दवाव
येँ (सन्ध्या टाइम्स)/नेपाली कांग्रेसया नेवाः नेता कार्यकर्तातय्सं दयेकातःगु लोकतान्त्रिक नेवाः दबू व लोकतान्त्रिक नेवाः खलःपाखें नेवाः प्रदेशया नितिं दबाव बियाहःगु दु ।
कांग्रेस केन्द्रीय कार्यसमितिया बैठकय् स्वनिगःयात राजधानी प्रदेशया रुपय् प्रस्तावित यासें छलफल यानाच्वंगुलिं दबू व खलःपाखें उकियात अस्वीकार यायेगु नापं नेवाः प्रदेश मंत धाःसा थःपिं सुंक च्वनेगु जुइ मखु धकाः दबाव बीगु ज्यायात तिब्ररुपं न्ह्याकूगु दु ।
थ्वहे झ्वलय् लोकतान्त्रिक नेवाः दबूया नायः गजेन्द्र मानन्धरं थौ दबूपाखें कांग्रेसया केन्द्रीय ज्याकू सानेपाय् वनाः राजधानी प्रदेशयात अस्वीकार यायेगु नापं नेवाः प्रदेशया माग यासें ज्ञापन पौ बीत्यंगु दु। अथे हे लोकतान्त्रिक नेवाः खलःया नायः नेमसिंह नकःमिं म्हिगः पार्टीया उपसभापति नापं संसदीय दलया नेता रामचन्द्र पौडेलयात नापलानाः नेवाः प्रदेश मंत धाःसा थःपिं सुंक च्वनेगु जुइ मखु धकाः जानकारी बियादीगु दु। लिसें आः कांग्रेसया मेमेपिं नेतात नं नापलानाः थ्वहे ख्याच्वः बीगु ज्या यायेत्यंगु दु ।
