१२ फिट तःधिकःम्ह बुद्ध मूर्तिया शिलान्यास

यल (सन्ध्या टाइम्स)/हःखा टोल सुधार संघया ग्वसालय् थनया १२ वडा स्थित हःखा त्वाःया कोटय् १२ फिट तःधिकःम्ह बुद्ध मूर्ति पलिस्था यायेत सिलान्यास जूगु दु। ज्याझ्वःया निंतिं बुद्ध प्रतिमा प्रतिस्थापन मूल समिति नीस्वनाः प्रतिमा निर्माणया ज्या जुयाच्वंगु दु। बुद्ध जयन्ती कुन्हु बुद्धया मूर्ति स्थापना यायेगु ताः दुगु खँ संघया सल्लाहकार सुशिला शाक्यं 'सन्ध्या टाइम्स'यात कनादिल ।

संघया नायः शरणकुमार शाक्यया अध्यक्षताय् न्ह्याःगु उगु मूर्ति निर्माणया निंतिं ३३ लाख ६० द्वः दां तुइगु अनुमान दु। मूर्ति निर्माणया निंतिं माःगु दां व धातु स्थानीय हःखा त्वाःया बासिन्दापाखें मुंकाच्वंगु दु।
हःखा त्वाःया गौरवमय पुरातात्विक बौद्ध सम्पदा स्थलय् शाक्यमुनि बुद्धया मूर्ति स्थापना यानाः श्रद्धा देछायेगु व बुद्ध शासन चिरस्थायी यायेगु आज्जुं थुगु ज्या न्ह्याकूगु खँ मय्जु शाक्यं कनादिल ।

वंगु शनिवाः थुगु हे विषयय् जूगु छगू सहलह मुँज्याय् मूर्ति स्थापना, आर्थिक संकलन लगायतया विषयय् बिचाः ब्याकूगु खः। उगु हे सहलहय् जगत सुन्दर परियत्ति केन्द्रं याःगु वक्तृत्वकला कासाय् उत्कृष्ट जूम्ह हःखा त्वाःया मय्जु एन्जिना शाक्ययात हनेगु ज्या नं जूगु खः ।