नेपाः पार्टीया उत्तर लागा कमिटी
येँ (सन्ध्या टाइम्स)/नेपाः राष्ट्रिय पार्टीया अध्यक्ष डा. केशवमान शाक्य व सभासद बुद्ध साय्मिया उपस्थितिइ येँ देय्या ल्हुतिइ नेपाः राष्ट्रिय पार्टीया उत्तर लागा कमिटी गठन जूगु दु ।
नेपाः राष्ट्रिय पार्टीया उत्तर लागा कमिटीया नायः पदय् निर्मल रत्न तुलाधर च्वनादीगु दुसा न्वकु पदय् श्यामकृष्ण मानन्धर, छ्यांज्ये कृष्णलाल मानन्धर, दांभरिं लक्ष्मीनारायण मानन्धर व दुजलय् पुर्ण महर्जन, कान्छाकाजी प्रजापति, रामदेवी श्रेष्ठ, शान्ति रंजित व रोशन पुतुवार च्वनादीगु दु ।
कमिटी गठन जूगु उगु ज्याझ्वलय् न्ववानादीपिं वक्तातय्सं ततःधंगु पार्टीया नेता धाःपिं म्हिगः तिनि झीगु लागाय् दुहां वयाः झीत हे छ्यलाः चुनाव त्याकाः झी हे स्थानीय आदिबासीतय्गु म्हसीका व अस्तित्व न्हंकेगु ज्या यानाच्वंपिं खः धासें आः उपिंप्रति सजग जुइमाःगु बिचाः प्वंकादीगु खः ।
न्हापा अज्याःगु अवस्थाय् नं छुं याये मफयाः असहाय जुयाः म्वानाच्वंपिं नेवाःतय्सं आः थःगु लागाय् थःपिंसं हे शासन याये दयेमाः धकाः जातीय स्वशासनया माग यानाः न्ह्याः वयाच्वंगु बारे नं कनेगु ज्या जूगु खः। लिसें न्हापा थःगु म्हसीका हे तंकाः कर्पिनि ख्वाः स्वयाः म्वानाच्वने माःगु खःसा आः थःपिनिगु लागिं नेवाःत थःपिंसं हे राजनीति यायेमाःगु ई वयाच्वंगु खँ नं कनादीगु खः ।
