राजधानी प्रदेश नेवाःतय्त स्वीकार्य मदु

संघीयता बारे आः नकतिनि वहस सुरु याःगु नेपाली कांग्रेसं नेवाःतय्सं बसोबास यानाच्वंगु नेवाःतय् लागायात 'नेवाः प्रदेश' मदयेकुसे राजधानी प्रदेश दयेकेगु धकाः पार्टी दुने पेश याःगु प्रस्तावयात उगु हे पार्टीया नेवाः कार्यकर्तातय्सं विरोध याःगु दु। नकतिनि क्वचाःगु नेकां समर्थित नेवाः कार्यकर्तातय् संस्था लोकतान्त्रिक नेवाः दबूपाखें कांग्रेसं प्रस्तावित याःगु राजधानी प्रदेशया विरोध यासें पार्टीयात अज्याःगु निर्णय यायेगुपाखें पनेगु ठहर समेत याःगु दु।
नेवाःतय् बसोबास दुगु थ्व लागायात राजधानी प्रदेश दयेकेगु धाःगुया अर्थ थन तप्यंक केन्द्रपाखें शासन यायेगु धाःगु खः। थ्व लागाय् केन्द्रं शासन यायेसातकि अन नेवाः प्रदेश धइगु दइ मखु। नेवाः प्रदेश मदइगु जक मखु, केन्द्रपाखें गुगुं भूभागय् थम्हं शासन यायेगु धइगु संघीयताया स्वरुप नं मखु। भारतय् नं राजधानी न्हूदिल्लीइ दुसां न्हू दिल्लीयात बिस्कं राज्यया मान्यता नं बियातःगु दु ।

राजधानी दुगु लागा गुगुं छगू प्रदेश दुने लात धायेवं उकिं राजधानीयात छुं पंगः थनीगु खँ मदु। नेवाःतय्सं बरु थःपिं राजधानी त्वःता छ्वयेत तयार दु तर नेवाः प्रदेश त्वःतेत तयार मदु धायेधुंकूगु दु। यदि राजधानी नं थन हे तयेगु खःसा उकिया लागिं छुं मेगु कथंया प्रवन्ध याये फइ। तर नेवाः प्रदेशयात नक्सां हुयाः उकिया थासय् राजधानी प्रदेश तयेत सुं नं नेवाः तयार जुइ मखु। नेवाः प्रदेश धइगु देय्या राजधानी दुगु कारणं यानाः विकास जूगु मखु। थ्व ला न्हापा हे विकास जुयाच्वंगु थाय् खः, बरु थन विकास जुइधुंकूगु खनाः पृथ्वीनारायण शाहं थःगु सुविधाया लागिं थ्व थाय्यात राजधानी दयेकूगु खः ।

More Stories Like this