बहाःबहिली बहीद्यः ब्वये

झी नेवाःतय्सं दछियंकं हनीगु थीथी नखःचखः मध्ये गुंलाया दकलय् तःधंगु महत्व दु। गुंलाज्वःछि नखःचखःत अतिकं सतिना वयेगु याइ ।

वंगु गुंलाथ्व पारुंनिसें न्ह्याःगु गुंला धर्र्म न्ह्याइगु पर्व नागपंचमि, थीथी बौद्ध लागाय् न्यायेकीगु पर्व पञ्चदान, गुंपुन्हि, सापारु, यलया मतयाः, कृष्णजन्माष्टमी, कृष्ण द्यःया जात्रा, यल भिंद्यः जात्रा, बुद्ध धर्म कथं येँ व ख्वपय् पञ्चदान व जुगः हिलीकथं जुगः चःर्‍हे, पितृपर्व कुश दुतिनीगु वा मांया ख्वाः स्वयेगु न्हि लानाच्वनी ।

थ्व गुंला लछिया निगू एकादशि व्रत नं लानाच्वनी - पुत्रदा एकादशि गुंलाथ्व व अजा वाय् जया एकादशि गुंलागाः खः।
आः थ्वहे एकादशियां कन्हय् द्वादशी कुन्हु स्वनिगःया स्वंगुलिं सहरया त्वाःत्वाः पतिकं बौद्ध समाज च्वनीगु बहाः बहिली बहाःया दलान थें कवः कवः खनेदुगु बहिली अमोघसिद्धि, रत्नसम्भव, अक्ष्योभ्य, वैरोचनया पञ्च बुद्ध, पौभाः किपा, अले मेमेपिं द्यःपिं तयाः झःझः धायेब ब्वया तइ ।

अले सापारुकुन्हु बहाः बहिली गुंला बाजं थानाः बही विहार स्वः वने कथं चाःहिलेगु ज्या जुइ। अथे भ्रमणय् वइपिंत क्यने कथं बहिद्यःयात थीथी कथंया सिसाबुसा गथे कि फ्वंसि, बँ फ्वंसि, तुसि, केरा, अं, पासि आदिया नापं थीथी कथंया मरित गथे कि लाखामरि, ज्वःप्रसाद, अनर्सा, खजुरि, निम्कि, प्यारा, लड्डु, बर्फि छानाः झःझः धायेक ब्वयातःगु दइ ।

थथे ब्वइगु येँया बहाःबही, यलया बहा-बही व ख्वपया बहाःबही जुयाच्वनी। थुकी येँ नगरय् बहीत थथे दु: क्वहिति बही, खुसि बही, मरु बही, यतखा बही, इतुं बही, नःघः बही, सिघः बही, ओम बही, लगं बही, कुंसा बही, लाय्कू बही, थँबही आदि खः। थुकी मध्ये खुसि बहीया त्यमां ख्वाःपाः नये नकिं ज्या थकिं, इतुं बहीया ध्वँलाय् हिति, लुँ आखः वहः आखःया थ्यासफू, थँबहीया तग्वः जाकि आखः सकस्यां ध्यान वनीगु ब्वज्यात खः ।

थुकथं हे यलय् कुन्ति बही, नः बही, ई बही, गुइतः बही, ईखाछेँ बही, ई बहाः बही, न्हाय्कं बही, धौगाः बही व पूच्व बहिली बहिद्यः ब्वज्या जुयाच्वंगु दइ। थुकी मध्ये गुइतः बहिली गुइत अजि नं क्यनेगु जुयाच्वनी। अथे हे ख्वपया झरु बही, तः बही, इला बही, गो बही, इना बही, सुखु बही आदि बहिली बहिद्यः ब्वज्या जुइगु खः ।

थुपिं थीथी थाय्या बहीबोय् सापारु, दथुसाया, जुजुं कृष्णाष्टमी न्ह्यः द्यः क्वकाइगु जुयाच्वनी। थ्व गुंलाया झ्वलय् बहिद्यः ब्वयेगु धइगु यंलाबलय् हाथु भैरव, इन्द्राजु द्यः ब्वये थें खः। कौलां नौरथया झ्वलय् पचली आजु भैरब जात्राकथं ग्वःफः, लगं, न्हूघः, चिकंमू, मरु तक हाथु पूर्ण भैरब ब्वइगु थें नं खः ।

More Stories Like this