त्रिविविया उपकुलपतिइ न्हापांम्ह किपूमि

ताः ई न्ह्यवंनिसें प्वनाच्वंगु त्रिविविया उपकुलपति पदय् सरकारं डा. हिराबहादुर महर्जनयात नियुक्त याःगु दु। दकलय् न्हापां ला संस्था सञ्चालन याइम्ह प्रमुख मनू हे मदयाः अलपत्र जुयाच्वंगु त्रिविविइ उपकुलपति नियुक्ति यायेगु ज्या सरकारं यात, थ्वहे बांलाःगु ज्या जुल। उकिसनं त्रिविवि धस्वानाच्वंगु किपूया स्थानीय जनतां थःगु हे लागाया सक्षम मनूयात भीसी दयेकेमाः धकाः आन्दोलन हे यानाच्वंगु सन्दर्भय् उकियात समेत संवोधन जुइक नियुक्ति जूगु कारणं थ्व नियुक्तिया मेगु छगू नं आयाम दुगु खने दत। थनिं न्यय्दँ न्ह्यः त्रिविवि स्थापना यायेत किपूया जग्गा काःबलय् त्रिविविया हरेक ख्यलय् किपूया स्थानीय जनतायात प्राथमिकता बीगु धकाः सहमति दयेकूगु खः। तर त्रिविवि पलिस्था जुइधुंकाः उगु सहमतियात पूर्ण रुपं वेवास्ता यानाः किपूया जनतायात छगू कथं धोका हे बीगु ज्या जुलसा आः वयाः किपूया जनतां उगु सहमति पालना यायेत दवाव बीगु याना हःगु खः। वहे दवावयात स्वीकार यासें थुगुसी सरकारं न्हापांखुसी छम्ह किपूमियात हे त्रिविविया भीसी नियुक्त यायेगु ज्या जूगु दु। थुकियात लसकुस याये हे माः। लिसें आः त्रिविविं थ्व क्रमयात अझ न्ह्याका यंकी धकाः नं आशा याये माली ।

त्रिविविया भीसी पदय् च्वनाः ज्या यायेगु गुलि जटिल व जोखिम धइगु खँ न्हू नियुक्त जुयादीम्ह डा. महर्जनं मसिउगु खइ मखु। थ्व जटिलतायात पार यानाः त्रिविवियात सफल शिक्षण संस्था दयेकेगु ज्याय् वय्कलं थःगु क्षमता क्यनेमाःगु दु। वय्कःया सफलता थौं किपूमि जनताया प्रतिष्ठालिसे नं स्वानाच्वंगु दु। उकी वय्कलं अब्बल जुयाः क्यनाबी माःगु दु ।

More Stories Like this