मिस लिटिल नेवाः-२०११ दुने छपुलु

अशोक बज्राचार्य

नेप्लिज फेशन होम्सं दँय्दसं याना वयाच्वंगु खुक्वःगु मिस लिट्टिल नेवाः-२०११ वंगु शनिवाः येँया नेपाल प्रज्ञा प्रतिष्ठानय् क्वचाल। नेप्लिज फेशन होम्सया नकिं हेमा मानन्धरया धापूकथं थ्व ट्यालेन्ट शोया उद्देश्य नेवाः मस्तय्त नेवाः भाय्, नेवाः संस्कृति व तजिलजिपाखे नुगः क्वसाकाः नेवाः भाय्, संस्कृति व तजिलजियात म्वाका तयेगु, विकास यायेगु व संरक्षण सम्बर्द्धन यायेगु खः। थ्व तसकं पवित्रगु विचाः खः। थुकिया लागि मस्तय्त लछियंकं ट्रेनिङ नं बिउगु खः। आः थुगु ज्याझ्वलय् छक्वः मिखा ब्वये:-

१) दकलय् न्हापां ला मय्जु हेमा मानन्धर थः हे नेवाः भासं खँ मल्हाइम्ह, खँय् भासं खँ ल्हाइम्ह खः। लछियंकं मस्तय्गु टे्रनिङया इलय् मय्जु हेमां मस्तनाप जक मखु मस्तय् मां-अबुनाप नं खँय् भाय् हे ल्हानादिल ।

२) अन ब्वति काःवःपिं अधिकांश मस्त नेवाः भाय् मसःपिं खः। उकी निम्ह वा स्वम्हेसिनं धाःसा नेवाः भाय् हे ल्हाःगु खः। थुथाय् लुमंकेबहः जू कि कन्टेस्टया नियम अनुसार मस्तय्सं नेवाः भासं हे थःगु म्हसीका बीमाः। न्ह्यसःया लिसः कि नेवाः भासं कि अंग्रेजीं बीमाः, अले जजपिंसं नं कि नेवाः भासं कि अंग्रेजीं हे जक न्ह्यसः न्यनेमाः। नेवाः भासं लिसः बिउपिं मस्तय्त न्हापांगु ग्राह्यता बी। तर बिडम्बनाया खँ, अन जजतय्सं नं खँय् भासं न्ह्यसः न्यनाच्वंगु दु, अले प्रतियोगीतय्सं नं खँय् भासं हे लिसः बियाच्वंगु दु। नेवाः भासं बांलाक थःगु म्हसीका व न्ह्यसःया लिसः बिउपिं न्हापांगु राउण्डय् आउट जुजुं वन। तर मसः मसः नेवाः भासं म्हसीका बिउपिं अले अंग्रेजी भासं न्ह्यसःया लिसः बिउपिं मस्त धमाधम सेलेक्ट जुजुं वन। जजपिंसं नेवाः भासं न्ह्यसः न्यंसां अधिकांश मस्तय्सं 'उड यू रिपिट द क्वइशन इन इंग्लिस्?' धकाः धाइगु। आः छिकपिंसं विचाः यानादिसँ थ्व ज्याझ्वलं गुलि तक थःगु आज्जु पूवंकी?

३) आः जजतपाखे छक्वः नं मिखा ब्वये। जजपिंमध्ये छम्ह युवा गायक निर्वाण श्रेष्ठ, छम्ह ब्यूटिशियन मय्जु पुष्पा जोशी, छम्ह गायिका प्राश्ना शाक्य खः। वय्कःपिंके भाषा प्रति गुलि तक झुकाव दु ले? न्ह्यसःपौ स्वयाः ब्वनाः तक नं नेवाः भासं बांलाक ब्वने मसः वय्कःपिं। मस्तय्सं मसः मसः नेवाः भाय् नवाःगु सिबें नं बांमलाः। आः धइदिसँ, थुज्वःगु निर्णायक मण्डलं पाय्छि निर्णय याइ ला?

४) आः प्रमुख अतिथि, विशेष अतिथिपाखे वने। प्रमुख अतिथि मय्जु लक्ष्मी शर्मा, विशेष अतिथि ट्राफिक प्रहरीया डीआईजी विज्ञानराज शर्मा। मिस लिट्टिल नेवाः धइगु नेवाः ज्याझ्वलय् सुं नेवाः हस्तियात प्रमुख अतिथि मयासे गैर नेवाःतय्त यायेगु, व नं राजधानी थेंज्याःगु थासय्, गन कि उलिमछि नांजाःपिं नेवाः हस्तित दु- थ्व गुलि तक पाय्छि जू?

५) मस्तय्गु ट्यालेन्ट शोलय् नं मस्तय्त खँय् म्येँय् नं प्याखं ल्हुइकल जब कि उलिमछि बांबांलाःगु नेवाः म्येँ दु। ग्वसाः खलकं दर्शकतय्त मनोरञ्जन बीगु झ्वलय् थीथी म्येँय् प्याखं ल्हुइकल। उकी छपु म्येँ दु � 'म प्यार बेचिदिन्छु, बहार बेचिदिन्छु...' गुकी मिजं प्याखंम्वःत अय्लाः त्वनाः प्याखं ल्हुयाच्वंपिं मिसापिंत नये थें गिद्ध मिखां स्वयाच्वनी। निम्ह स्वम्ह मिसापिंसं इमित पंखां गायेकाच्वनी, छगू कोठीया दृश्य। आः थुकिं लिट्टिल नेवाःया ९-१३ दँ दुपिं मय्जुपिंत अले स्वयाच्वंपिं दर्शक मस्तय्त छु लिच्वः लाइ? गुज्वःगु सन्देश बी?

६) दकलय् न्हिले मास्ते वइगु खँ- थ्व ज्याझ्वलय् नेवाः भाय्यात अप्वः बः बीगु अले नेवाः भासं नवातकि अप्वः ल्याः दइ धयातःगुलिं गुलिं गुलिं मांअबुपिंसं थः मस्तय्त नेवाः भासं खँ मल्हाइम्ह जूसां थःगु म्हसीका बीगु झ्वलय् "जय मां भाय्" धायेकेगु ल्वःममंकू। तर वयां लिपा हाकनं वहे अंग्रेजी भाय्, वहे खँय् भाय्। न्हाप लाःम्ह मय्जु प्रकृति महर्जनं नं थःगु म्हसीका बीगु झ्वलय् "जय मां भाय्" यात बः बियाः नवाःगु खः तर वय्कः थः नं छेँय् मां-अबुनाप खँय् भाय् हे ल्हाइम्ह जुयाच्वन ।

समग्र रुपं कायेबलय् नेवाः भाय् कम अंग्रेजी व खँय् भाय् अप्वः दुगु थुगु ज्याझ्वःयात मिस लिट्टिल नेवाः धकाः धाये मल्वः। नेवाः धइगु शब्द हे हटे यानाः छ्वया बीमाः। आयोजकं नेवाःतय्गु "नेवाः भावना" नाप म्हिताच्वंगु खनेदु। वय्कलं नेवाः मस्तय् प्रतिभा विकास यायेत थुज्वःगु ज्याझ्वः यानादीगु सकारात्मक खँ खः तर थुकियात नेवाः पहः बिया यंकेत धाःसा यक्व सुधार यायेमाःगु खनेदु। अन्तय्, ग्वसाः खलः व मस्तय्त खँय् भाय् स्यनाच्वंपिं मां-अबुपिंसं थ्व च्वसुइ सुलाच्वंगु नेवाः मर्मयात थुइकाः सकारात्मक रुपं काइ धकाः भलसा कयाच्वना ।

More Stories Like this