पुरातात्विक महत्वं जाःगु ल्वाभःया छानविन

येँ (झीगु स्वनिगः)

व्यवस्थापिका संसद्या राज्य व्यवस्था समितिं नेपाली सेनाया संरक्षणय् दुगु ऐतिहासिक व पुरातात्विक महत्वया पुलांगु ल्वाभः म्यूगु बारे छानबिन न्ह्याकीगु जूगु दुसा पुलांगु ल्वाभः कवाडीया भावय् म्यूगु खा सीदयेवं संसदीय समितिं छानबिन न्ह्याकेत्यंगु खः । थुकिया नितिं समितिं वइगु शुक्रबाः राज्य व्यवस्था समितिया बैठक सःतूगु दु । बैठकय् रक्षामन्त्री विष्णु पौडेल, रक्षा छ्याञ्जे नविन घिमिरे व प्रधानसेनापति छत्रमान सिंह गुरुङयात नं सःतूगु दु ।

झिंछदा न्ह्यः तत्कालीन जनयुद्धया इलय् सरकारं अत्याधुनिक ल्वाभः दुत हयेगु भवलय् इतिहास म्हसीकीगु करीब प्यसः व न्यय्गू टन ल्वाभः म्यूगु खः । सरकारं उगु ल्वाभः अमेरिकाया न्यूजर्सीस्थित 'इन्टरनेशनल मिलिटरी एन्टिक्स' या प्रमुख क्रिश्चियन क्रान्मरयात म्यूगु खा सीदुगु खः । उगु इलय् न्यय्गू लख अमेरिकी डलर अर्थात करीब स्वीन्यागू करोड तकां उगु पुरातात्विक महत्वया ल्वाभःत म्यूगु पत्रपत्रिकाय् बुखात पिहांवःगु खः ।