स्वंगूगु देय्पाखें नेपाः दुहांवइपिं पर्यटकय् वृद्धि

भैरहवा नाका जुयाः स्थलमार्गपाखें नेपाः वइपिं विदेशी पर्यटकतय्गु ल्याः वंगु दाया तुलनाय् थुगु दा नीच्यागू दशमलव च्यागू प्रतिशतं थहांवंगु दु । अध्यागमन ज्याकू बेलहियाया कथं स्थलमार्ग जुयाः दकले अप्वः विदेशी पर्यटक वइगु उगु नाकापाखें चालु दाया न्ह्यलायादुने न्यय्खुद्वः व गुसः व पीच्याम्ह विदेशी -भारतीय बाहेक) पर्यटक नेपाः दुहांवःगु खः । ज्याकू प्रमुख राजेन्द्रराज अधिकारीं वंगु दा उगु हे अवधितक्क थ्व नाका जुयाः पीप्यद्वः व प्यसः व ख्वीप्यम्ह स्वंगूगु देय्या पर्यटकया आगमन जूगुलिइ थ्व दा स्थलमार्ग जुयाः वइपिं पर्यटकतय्गु ल्याः जुलाई महिनातक्क न्ह्यःथने बहःगु वृद्धि जूगु जानकारी बियादीगु दु ।

नेपाल पर्यटन द २०११ या न्हापांगु महिना जनवरीइ न्ह्यद्वः व न्यासः व न्यय्छम्ह विदेशी स्थलमार्गया बेलहिया नाका जुयाः वःगु खः । अथेहे फेब्रुअरीइ झिंन्ह्यद्वः व खुसः व स्वीम्ह, मार्चय् नीद्वः व खुसः व पीनिम्ह, अपि्रलय् न्याद्वः व निसः व स्वीछम्ह, मेसं द्वःछि व गुसः व पीस्वम्ह, जुनय् निद्वः व प्यम्ह व जुलाईसं निद्वः व गुसः व च्यय्स्वम्ह पर्यटकत वःगु तथ्यांक क्यंगु दु । थ्व दाया जुलाई महिनाय् पर्यटक आगमन ल्याः नापं न्हापाया दाया उगु हे महिनाया तुलनाय् न्ह्यसः व नीखुम्ह अप्वः दुगु ज्याकुथिं जानकारी ब्यूगु खः । जुलाई महिना पर्यटन व्यवसायया नितिं बेमौसमी कथं कयातःसां नं पर्यटक आगमनय् वृद्धि जूगु दु ।

जुलाई महिनाय् दकले अप्वः श्रीलङ्काया च्यासः व नीन्ह्यम्ह पर्यटक वःगु खःसा हल्याण्डया प्यसः व स्वीन्ह्यम्ह, स्पेनया स्वसः व स्वीगुम्ह, थाइल्याण्डया निसः व न्यय्छम्ह, चीनया निसः व न्याम्ह, दक्षिण कोरियाया सच्छि व न्ह्यस्वम्ह वःगु खः । थ्वहे अनुपातय् पर्यटक आगमन जूसा थ्व नाकापाखें जक सन् २०११ सं छगू लख स्वीद्वः स्वयाः अप्वः विदेशी पर्यटक दुहांवइगु धुकुमाः यानातःगु दु ।
थ्व नाका जुयाः वइपिं पर्यटकतय्गु मुख्य गन्तव्य धइगु लुम्बिनी, पोखरा, ये, चितवन, मनाङ, मुस्ताङ व पाल्पा खः ।

More Stories Like this