गतिरोध अन्त्यया न्यागू अवधारणा
येँ (झीगु स्वनिगः)
देशय् न्ह्यानाच्वंगु राजनीतिक गतिरोध अन्त्यया नितिं नेपाल नागरिक मञ्चं शान्ति प्रक्रिया, संविधान निर्माण, संघीयता, अर्थतन्त्र व राष्ट्रिय सहमतिलिसेया न्यागू बुदे अवधारणा सार्वजनिक याःगु दु । रिपोर्टर्स क्लबय् मंगलवाः याःगु अन्तर्त्रया ज्याभवलय् सार्वजनिक अवधारणापत्रय् माओवादी जनसेनाया समायोजन व पुनःस्थापनाया नितिं राजनीतिक सहमति जुइमाःगु सुझाव ब्यूगु खः । अथेहे आःतक्क संविधान निर्माणय् पूवंगु ज्या, सहमति जुइ ल्यं दनीगु विषयलय् दलतय्गु अडान व संविधान निर्माणया विषय कःघानाः संविधान सभाया नायः वा संबैधानिक समितिया सभापतिं श्वेत पत्र पिथनेमाःगु सुझाव नं अवधारणा पत्रय् कःघानातःगु खः ।
मञ्चं राज्य पुनःसंरचना आयोग नीस्वनेमाःगु, बजाः भाः थिकय् जूगु नियन्त्रण यायेमाःगु, सिण्डिकेटया अन्त्य यायेमाःगु लगायतया सुझाव नं ब्यूगु खः ।
अन्तर्त्रियाय् न्वंवानादिसें मञ्चया नायः हिमालय समशेर राणां सहमति बिना देय्या आर्थिक, सामाजिक रुपान्तरण जुइमफइगु दाबी यासें दलतय्सं कार्यकर्ता स्वयाः नं जनताया पीडा, मर्का, चिउताःयात बिचाः याःसा राष्ट्रिय सहमति जुइफइगु व थुकिं देय्या फुक्क समस्याया समाधान याइगु दाबी नापं यानादिल ।
