सुविधाया गाडी लित बिइत निर्देशन

येँ (झीगु स्वनिगः)

पूर्वमन्त्री लिसे सरकारी कर्मचारीं छ्यलाः वयाच्वंगु सुविधाया गाडी लित बिइत व्यवस्थापिका संसद्या अर्थ व श्रम सम्बन्ध समितिं निर्देशन ब्यूगु दु । समितिया मंगलवाः च्वंगु बैठकं दुरुपयोग जुयाच्वंगु सुविधाया सवारी लित बिइत झिंन्यान्हुया अल्टिमेटम नापं ब्यूगु खः । सरकारी सेवापाखें बञ्चित जुइधुंकाः झिंन्यान्हुयादुने सुविधाया सवारी लित बिइमाःगु जूसां नं आःतक्क लिच मब्यूनीपिं पूर्व उपप्रधानमन्त्री लिसे मन्त्रीतय्त झिंन्यान्हुया अल्टिमेटम ब्यूगु समिति सभापति सुशिला कन्दङवां जानकारी बियादिल । समितिं सरकारी संस्थान लिसे विकास परियोजनां ब्यूगु गाडी नं लित हयेत निर्देशन ब्यूगु खः । उमिसं दुरुपयोग जुयाच्वंगु गाडी लित हयाः न्हूगु वितरण नापं पनेत निर्देशन ब्यूगु खः । बैठकं सरकारी सवारीया बीमा व्यवस्था यायेत लिसे सरुवा जुइगु सरकारी कर्मचारीतय्त पुलांगु हे सवारी छ्यलेगु व्यवस्था मिलय् यायेत नापं निर्देशन ब्यूगु दु ।