कांग्रेसया राजधानी प्रदेश

नेवाः आन्दोलनं कांग्रेसपिने लाइगु

येँ (झीगु स्वनिगः)

छुं ई न्ह्यःतक्क राज्य पुनःसंरचनाया विरुद्ध खनेदयाच्वंगु नेपाली कांग्रेसं नेवाःतय्गु ताःहाकःगु बलिदान व संघर्षं स्थापित जुइत्यंगु नेवाः स्वायत्त राज्य विरुद्ध राजधानी प्रदेशया नां न्ह्यःने हयाः तःधंगु विवादय् तक्यंगु दु ।सामन्त राज्यया पृष्ठपोषक नेपाली कांग्रेस नेवाः स्वायत्त राज्यप्रति सकारात्मक जुइ मफूगुया ल्यूने कांग्रेसं कयावयाच्वंगु सामन्ती चिन्तन, यथास्थितिवादी व प्रतिगामी हर्कतकथं कयाहःगु दु ।

स्वायत्त राज्य जक मखु संघीयताय् दुहांवने हे चाहे मजूगुया ल्यूने विस्तारवादी भारतया लिपांगु संकेत कथं काःगु दु । सत्ता परिवर्तनया लिपांगु इलय् भारतं मधेशवादीतय्गु ग्वाहालिं नेपाली कांग्रेसयात न्ह्यःने हयेगुया ल्यूने थ्वहे राजधानी प्रदेश खः ।

भारत नेवाः स्वायत्त प्रदेशया पलेसा राजधानी प्रदेश दयेकेगु उपयुक्त जुइधयागु सन्देश न्हू दिल्लीपाखें वयेवं कांग्रेसं उगु हे कथं थःगु धारणा दयेकूगु हुइना भुइना न्यनेदु । भारतया आदेशयात छेनय् तयाः नेवाः स्वायत्त राज्यया अवधारणायात आत्मसात यानाः नेवाःतय्गु सहानुभूति कायेमाःम्ह कांग्रेसं उकियात ध्याक्वय् वांछ्वयाः नेपाली कांग्रेस घाटाय् वनीगु सूत्रं धाःगु दु । नेवाः आन्दोलनय् सक्रिय जुयाच्वंपिं नेपाली कांग्रेसया कार्यकर्तातय्गु आन्दोलनं पिनेतयेगु नेपाली कांग्रेसया चाल जूगु खँ कार्यकर्तातय्सं हे धयाहयाच्वंगु दु । थुया दथुइ नेवाः लोकतान्त्रिक दबूया हालै च्वंगु छगू मुंज्या कांग्रेसया राजधानी प्रदेशया खायात अस्वीकार यासें केन्द्रीय समितिया विरोध पौ लःल्हायेत्यंगु दु ।

उगु पौ बीत छगू तःधंगु हे मुंज्या तयाः सहलह ब्याकूगु खः । तर कांग्रेसी सांसदत नं दुथ्याःगु उगु पुचलं बीत्यंगु विरोध पौयात केन्द्रीय समितिं महत्व बीगु म्हो हे जक आशा दुगु धाःगु दु । नेवाः स्वायत्त प्रदेशया विरोध यानाः न्हूगु कथं हःगु राजधानी प्रदेशया अवधारणां नेपाली कांग्रेस नेवाः आन्दोलनं पिने लाइगु राजनीतिक विज्ञपिंसं दाबी याःगु दु । न्हापा एमाले नेवाःतय्गु हक अधिकारयात त्वःताः स्वनिगलं एमालेया पत्ता साफ जूथें आः वहे गल्ति नेपाली कांग्रेसं दोहरे यायेत्यंगु इमिगु धापू खः । नेवाः आन्दोलनयात थुइके मफूगु पार्टी व उया नेतात स्वनिगलं पिनेलाइगु इतिहासं चिल्लाय् चिल्लाय् दनाः कनाच्वंगु यात कांग्रेसं तायेके मफूगु उगु पार्टीया ऐतिहासिक भूल खः । विज्ञपिनिगु निष्कर्ष दु ।