त्रिविविइ थौंनिसें तालाबन्दी
भीसी नियुक्तियात माओवादी व कांग्रेसया विरोध
येँ (सन्ध्या टाइम्स)/सरकारं किपूमि नेवाःतय् सःयात कदर यासें न्हापांखुसी छम्ह किपूमियात त्रिविविया उपकुलपति नियुक्त याःगु खँय् किपूमि जनता लय्तायाच्वंगु इलय् लाक्क त्रिविवि लगायत थीथी विश्वविद्यालयय् याःगु नियुक्ति पाय्छि मजू धासें एनेकपा (माओवादी) व नेपाली कांग्रेस समर्थित प्राध्यापकतय्सं थौं त्रिविविइ तालं ग्वया बिउगु दु ।
माओवादीलिसे सतीगु नेपाल राष्ट्रिय प्राध्यापक संगठन व कांग्रेसलिसे सतीगु प्रजातन्त्रवादी प्राध्यापक संघं थौं किपूया त्रिविवि केन्द्रीय क्याम्पसया मूलुखा व प्रशासन कक्षय् तालं ग्वया बिउगु दु। उमिसं थ्व तालाबान्दी अनिश्चितकाल तक न्ह्याइगु खँ नं धाःगु दु ।
माओवादी समर्थित प्राध्यापकतय्सं सत्ता साझेदार दललिसे सहलह तकं मयासे उपकुलपति नियुक्त यात धासें विरोध याःगु खःसा कांग्रेस समर्थित प्राध्यापकतय्सं चाहिं श्रावण २८ गते राजीनामा बीगु तयारी यानाच्वंगु सरकारं वने त्ययेकाः थथे यकःति रुपं नियुक्ति बीगु ज्या यात धासें उकिया विरोध याःगु खः। राजीनामा बीत्यंम्ह सरकारं याःगु थ्व नियुक्तियात कांग्रेस समर्थक प्राध्यापकतय्सं 'बेइमानीपूर्ण ज्या' धकाः संवोधन याःगु दु। थ्व प्राध्यापकतय्सं आः मेमेगु विश्वविद्यालयय् नं तालं ग्वयेगु ग्वसाः दुगु खँ धाःगु दु। थ्व नियुक्तियात सरकारं लित मकाःतले आन्दोलन जारी हे जुइगु खँ नं उमिसं धाःगु दु ।
उखे किपूया नेवाः स्वायत्त राज्य मंकाः परिषदं धाःसा न्हापांखुसी छम्ह किपूमि व्यक्तित्वयात भीसी नियुक्त याःगु खँय् जूगु थ्व विरोधयात कयाः थःपिं गम्भीर जुयागु खँ धाःगु दु। त्रिविविइ किपूया डा. हिराबाहादुर महर्जनयात भीसी नियुक्तयाःगु खः ।
