मचा बुइ थाकु, मचा बुलं........
ख्वप (सन्ध्या टाइम्स)/श्रावण महिनाया सोमवाः पतिकं जुइगु दत्तात्रय मेलाय् वःम्ह छम्ह मिसां म्हिगः देगःया पिनेसं हे मचा बुइकल। फल्चाय् बाय् च्वं वःम्ह उम्ह मिसां अन हे मचा बुइकूगु खः ।
मचा बुल, मचा बुइधुंकाः अन छगू नाटकीय घटना जुल। मचा बूम्ह मिसाया छु याये छु याये जुयाच्वंगु इलय् लाक्क हे उम्ह मचा लहीत थम्हं यंके धाः वःम्ह छम्ह मनू अन थ्यंकः वल। मिसा नं थम्हं बुइकाम्ह मचा वयात हे बिया छ्वयेत तयार जुल। थथे सार्वजनिक रुपं हे मचा कालबिल जुयाच्वंगु खनाः अन मनूत म्वःम्वः जुइक मुं वल। तर काइम्ह व बीम्ह निम्हं तयार जुसेंलि अन निम्हेसिया दथुइ छकू भ्वं हे यानाः मचा दान बियाछ्वयेगु ज्या जुल ।
तर गुम्ह मनुखं मचा दान काःगु खः, वं उम्ह मचा थःगु लागिं काःगु मखुसें मेम्ह हे छम्ह मनूया लागिं काःगु जुयाच्वन। व ला दथुइ च्वनाः ज्या याइम्ह एजेण्ट जक लानाच्वन। मचा कयाः वं गुम्हेसित माःगु खः वयात बीयंकल। तर उम्ह एजेण्टयात मचा धयातःम्ह मनुखं धाःसा अथे लँय् सार्वजनिक रुपं सकस्यां सीक मचा ज्वना वल धकाः उम्ह मचायात लहीत अस्वीकार याना बिल। उकिं यानाः दथुइ च्वनाः ज्या याःम्ह एजेण्ट बाम्हय् कात। उम्ह एजेण्टं छुं भचा ध्यबा कमिशन नयाः अथे मचा यंका बीगु कुतः याःगु जुयाच्वन। तर मचा काइम्ह मनुखं अस्वीकार यायेवं उम्ह मचा वं हे लही यंके धकाः ज्वना वंगु दु। वं मयः मयः मचा लहित धाःसा मचाया भविष्य असुरक्षित जुइगु आशंका याना हःगु दु ।
