राजधानी प्रदेशयात दबूया विरोध
येँ (सन्ध्या टाइम्स)/नेपाली कांग्रेस समर्थिन नेवाःतय्सं चायेकातःगु लोकतान्त्रिक नेवाः दबूया म्हिगः क्वचाःगु तःमुँज्यां नेपाली काँग्रेसं येँ लागायात राजधानी प्रदेश दयेकेगु कथं न्ह्यब्वःगु प्रस्ताव प्रति आक्रोश प्वंकुसें थ्व लागायात 'नेवाः प्रदेश' कथं हे घोषणा यायेमाः धकाः पार्टीयात दवाव बीगु निर्णय याःगु दु। थुकिया लागिं दबूपाखें कांग्रेसया केन्द्रीय ज्याकूयात ज्ञापनपौ समेत बीगु निर्णय नं याःगु दु ।
दबूया तःमुँज्यापाखें थःपिनि न्हूगु नेतृत्व ल्ययेगु ज्या नं याःगु दु। न्हूगु नेतृत्वय् नायः पदय् गजेन्द्र मानन्धरयात ल्यःगु दु। अथे हे महेन्द्रमान सिंह, डा. अनुप श्रेष्ठाचार्य, राजुभाई मानन्धर, भगवान शाक्य, रामशरण महर्जन, जगदीश नेपाली, योगेन्द्रमान श्रेष्ठ, शैलेश शाक्य, रामनारायण महर्जन, मय्जु जीवन डंगोल, मय्जु डा. कुसुम शाक्य, सागर पुतुवार व नाति महर्जनपिं दुजःकथं निर्वाचित जूगु खः। निर्वाचित जूपिनिगु बैठकं जक पद विभाजन जुइगु खँ धाःगु दु ।
