नेवाः प्रदेश बारेनेवाः सभासद्तय् चिउताः
संविधानसभापाखें नेवाः राज्य सुनिश्चित यायेगु खःसा आः हरेक नेवाःतय् छेँखाछेँखां सतकय् क्वकायेमाःगु बिचाः नेवाः सभासद्तय्सं प्वंकूगु दु। वय्कःपिंसं आः गोष्ठी व ज्ञापनपौ लःल्हायेगु ज्या जक मयासे नेवाःतय्त सतकय् हयाः तःधंगु आन्दोलन यायेमाःगु बिचाः प्वंकूगु दु ।
नेवाः स्वायत्त राज्य मंकाः संघर्ष समितिं म्हिगः संविधानसभा व नेवाः स्वायत्त राज्य बारे याःगु अन्तर्क्रिया ज्याझ्वलय् न्ववासें नेवाः सभासदतय्सं संविधान निर्माणया ज्या सभासद्तपाखें मजुसे छगू पुचः, आयोग व स्वम्ह नेतात च्वनाः जक यानाच्वन धासें नेवाः राज्य प्राप्तिया निंतिं आः सशक्त सतक संघर्ष यायेमाःगु खँय् बः बियादिल ।
मंकाः संघर्ष समितिया नायः दिलबहादुर श्रेष्ठया सभापतित्वय् जूगु उगु ज्याझ्वलय् माओवादीया सभासद् हितमान शाक्यं राज्य पुनर्संरचना व राज्य शक्ति बाँडफाँट समिति हे दयेके मजिउ धया जूपिं नेतात थौं राज्य पुनर्संरचना आयोग दयेकेमाः धकाः संघीयताय् मवनेगु षड्यन्त्र यानाच्वंगु खँ कनादिल। वय्कलं माओवादी नेवाः राज्यया पक्षय् दुगु स्पष्ट यासें यदि माओवादीं नेवाः स्वायत्त राज्यया माग त्वःतल धाःसा थम्हं माओवादी हे त्वःता बीगु घोषणा तकं यानादिल ।
नेकपा एमालेया सभासद् डा. मंगलसिद्धि मानन्धरं कांग्रेसं पहिचान व सामर्थ्यया आधारय् राज्य पुनर्संरचना यायेगु धाःसां न्हय्गू प्रदेशं जक पहिचान व सामर्थ्यया संवोधन याये मफइगु दावी यानादिल। वय्कलं स्वायत्तता व स्वशासन बिना झीगु पहिचानया रक्षा मजुइगु खँ कनादिल। नेपाः राष्ट्रिय पार्टीया सभासद् बुद्ध साय्मिं राजधानी प्रदेश दयेके न्ह्यः नेवाःतय् लाशय् न्हुया वनेत नेतातय्त हाथ्या बियादिल ।
ज्याझ्वलय् मंकाः संघर्ष समिति सचिवालयया कजि मल्ल के. सुन्दरं भदौ १४ दुने संघीयता बिनाया मस्यौदा तयार यायेगु व लिपा स्वनिगःयात राजधानी प्रदेश दयेकेगु षड्यन्त्र जुयाच्वंगु खँ कनादिल ।
