डडेलधुराया जंगलय् बाबुराम भट्टराई पक्षया गोप्य भेला
येँ (सन्ध्या टाइम्स)/प्रधानमन्त्रीया दावेदार माओवादी उपाध्यक्ष डा. बाबुराम भट्टराई पक्षधर नेता कार्यकर्तातय्गु गोप्य भेला थौं डडेलधुराया महाभारत जंगलय् च्वंगु दु ।
उगु भेलाय् सुदूरपश्चिम जिल्लाया डोटी, बैतडी, बाजुरा, बझाङ, दार्चुला, अछाम व कैलालीया बाबुराम पक्षीय कार्यकर्तातय्सं ब्वति कयाच्वंगु दु। उगु बैठकय् मू पाहां कथं ब्वति कायेत माओवादी पोलिटब्युरो दुजः देवेन्द्र पौडेल म्हिगः बहनी लिबाक डडेलधुरा थ्यंकः वंगु खः। थौं सुथंनिसें अन बैठक सुरु जूगु खँ धाःगु दु। बाबुराम पक्षीय उगु भेलायात प्रचण्ड पक्षीय कार्यकर्तातय्सं धाःसा विरोध यासें औचित्यहिन भेला धाःगु दु ।
उगु भेलाय् डा. भट्टराईनं पेश यानादीगु शान्ति व संविधानया लाइन बारे सहलह जुइगु खँ धाःगु दु। अथे खःसां थौंकन्हय् डा. बाबुराम भट्टराई प्रधानमन्त्री जुइगु चर्चा जुयाच्वंगु इलय् भेला जूगुलिं थुकियात अर्थपूर्णं रुपं काःगु दु ।
