बौद्ध न्ह्यसः-लिसः कासा क्वचाल
ख्वप (सन्ध्या टाइम्स)/२६०० क्वःगु धर्मचक्र प्रवर्तन दिवसया लसताय् धर्मोदयसभा ख्वप शाखापाखें धर्मोदय अन्तर मा.वि. बौद्ध न्ह्यसःलिसः कासा यात। मुनिविहारय् जूगु उगु कासाया फाइनलय् जेन्युइन सेकेन्डरी स्कूल 'ख' न्हाप, विद्या विकास सेकेन्डरी बोर्डिङ्ग स्कूल लिउ व जेन्युइन सेकेण्डरी स्कूल 'क' लियांलिउ लाःगु खः। अथे हे सरस्वती विद्यागृह मा.विं. हःपाः सिरपाः त्याकूगु खः ।
पञ्चशील प्रार्थना यासें न्ह्याःगु उगु ज्याझ्वलय् न्हाप जूगु स्कूलया प्रधानाध्यापक विश्वबहादुर दुवालं ब्वँमिपिंत बुद्धधर्म व बौद्धिक ज्ञान चूलाइगु थुज्वःगु ज्याझ्वः रचनात्मक जू धयादिल। धर्मोदय सभाया केन्द्रीय उपाध्यक्ष प्रा. सुवर्ण शाक्यं बुद्धधर्मय् आधारित ज्याझ्वः यायेबलय् सुं बुइगु वा त्याइगु मजुइगुलिं थुज्वःगु ज्याझ्वःत न्ह्याकावं वनेत सल्लाह बियादिल। वरिष्ठ उपाध्यक्ष लक्ष्मीदास मानन्धरं थुज्वःगु ज्याझ्वलं ब्वँमिपिंत बौद्ध शिक्षा प्रचार यानावं वनेमाः धयादिल। भिक्षु निग्रोधं सिरपाः त्याकूगु पुचःयात सिरपाः लःल्हानाबिज्यात ।
निर्णायक जुयादीम्ह सुगतरत्न बज्राचार्यं ब्वँमिपिंत ज्ञान दइकथंया सरल न्ह्यसःत हे तयागु खँ स्पष्ट यानादिल। ज्याझ्वलय् सचिव महेन्द्रराज शाक्यं लसकुस व कोषाध्यक्ष कलेशराज शाक्यं सुभाय् बियादीगु खः ।
