नेवाः विरुद्ध नेपाली कांग्रेस

अमीररत्न ताम्रकार

थःयात प्रजातन्त्रया मसिहा, प्रजातन्त्रया ठेक्केदार धयावःम्ह नेपाली कांग्रेस नेवाःतय्गु विरुद्ध कुहां वःगु दु । सामान्तवाद व जमिन्दार भूमिपतितय्गु वर्गिय स्वार्थ पूर्तिया नितिं समर्पित नेपाली कांग्रेस आः वयाः नेवाःतय्गु हित, चाहना व भविश्ययात तुषारापात यायेगु उदेश्यं नेवाः स्वायत्त राज्यया विरुद्ध राजधानी प्रदेशया मान्यता ज्वनाः न्ह्यःनेवःगु दु । संघीयताया विरोधी, राज्य पुनर्संरचनाया विरुद्ध, न्हूगु संविधानयात अस्वीकार यानावयाच्वंगु नेपाली कांग्रेस आः नेवाःतय्गु मात्रै भोट वैंकया रुपं छ्यलेगु व इमिगु भावना व चाहनायात गालय् थुनेगु नियतं नेपाली कांग्रेसं राजधानी प्रदेशया अवधारणायात न्ह्यःने हयाः, यथार्थय् नेपाली कांग्रेस नेवाः विरुद्ध छगू साम्प्रदायिक ब्राम्हणवादी पुरोहित वादी पार्टीकथं थःयात सीमित याःगु दु ।

नेपाली कांग्रेस स्वसांनिसें भाषा जातियात खास थाय् वियावःगु खनेमदु । प्रजातन्त्रया नामय् मुक्त कन्थं च्वछायेगु वाहेक कांग्रेसी नेतातय्सं खास प्रजातन्त्र धयागु छु व छु झंगःया नां धयागु खँय् नं प्यम्ह नेताया प्यताहे खँ न्ह्यःनेतया वःगु दु । वीपीं भाषा जातिया खँय् खास विचाः प्वंकूगु खनेमदु । गणेशमानया धापूकथं देशय् प्रजातन्त्र मवःतले भाषा जातिया समस्या ज्यनी मखु जक धायेगु वाहेक मेगु थप खँ न्ह्यःने महः । २०४७ सालया संविधान लिपा अज्ज ०६२/६३ या आन्दोलन लिपा गणेश मानया भाषा जातिया खँ पूर्णत झूठ सावित जुल । सामन्ती व्यवस्थां लोकतान्त्रिक गणतन्त्रय् नेपाः दुहां वन तर भाषा जातिया समस्याया समाधान मजू । प्रजातन्त्र वलकि भाषा जाति सम्वन्धी समस्या ज्यनी धयागु गणेशमानया धापू फेल नःगु दु । यथार्थय् नेपालय् विहारी प्रजातन्त्र वयेगुतुं भाषा जाति जक मखु छुंनं समस्याया समाधान सम्भव मदु । भाषा जातियात नेपाली कांग्रेसं गवलेंहे समस्या कथं काःगु मदु । थ्व विषयलय् अध्ययन यानाः सम्वोधन यायेगु जरुरी दु धयागु कांग्रेस व उया नेतातय्सं गवलें विचाः हे मयाः । अध्ययन मनन यायेगु ज्याय् कांग्रेसत न्ह्यावलें ल्यूनेहे लाःगु याहे कारणं न्हूगु राजनीतिक परिवेश वइगुनितिं पूर्णत न्हूगु व पुलांगु मूल्य व मान्यतां मुक्त जुइमफूगुया हे द्योतक खः । थ्वहे कारणं यानाः नेपाली कांग्रेस थौं तक्क नं अन्तरद्वन्द्वय् दु, विवादास्पष्ट अवस्थाय् लानाच्वंगु दु । न्हूगु राजनीतिक परिवेशया पूर्णत विरोधी व वं आत्मसात याकेफूगुया छगूया छगू कारण खः ।

नेपाली कांग्रेसं हःगु राजधानी प्रदेशया अवधारणा दुने परिवर्तनयात मखु, यथास्थितियात तयातयेगु आभाष व्यूगु दु । कांग्रेस जनताया दथुं दनावःगु सःयात न्हाय्पनं तायेके फूगु मदु । आदिवासी जनताया माग छु दु, गरिव निमुखा व सीमान्तकृत जनतायात गथ्य यानाः न्ह्यःने हयेगु धयागु खँय् कांग्रेसया विचाः शून्य । वर्तमान स्वनिगःयात गथ्य दु अथ्य हे तयातयेगु पाय्छि मखु । स्वनिगः अर्थात नेपाल मण्डल नेवाःतय्गु खः । थ्व खँयात नेपाली कांग्रेसं राजधानी प्रदेशया अवधारणा हयाः पूर्णत अस्वीकार याःगु दु । स्वनिगलं नेवाःत विस्थापित अवस्थाय् थ्यनाच्वंगु दु । थःगु जन्म स्थान त्वःताः थःगु त्वाः बाः त्वःताः रिङ्गरोडं जःखः थःगु वस्ति दयेकाः च्वंवनाच्वंगु दु । स्वनिगः दुने अधिराज्यया गां गामं जनतात थीथी उदेश्य ज्वनाः स्वनिगः दुहां वयाच्वंगु दु । न्हू न्हूगु अवसर व सुविधाया लोभं दुहां वयाच्वंपिं गैर नेवाःतय्त पनेगु जरुरी दु । विना योजना विना आधार थुगुहे कथं मनूतय्त दुतकायेगु ज्यायात मपन धाःसा स्वनिगः मनू च्वनेत लायक वस्ति जुइमखु ।

दुहां वयेगुया नं कारणत दये माः । शिक्षा, व्यापार, रोजगारी लगायत उदेश्यं स्वनिगः दुहां वइपिन्त ज्या क्वचायेवं थःथःगु थासय् लित छ्वयेगु व्यवस्था जुइमाः यदि थथ्य मयाःसा मनूत छक्वः ज्या ज्वनाः वइपिं स्थायीरुपं थनहे च्वनेत स्वइ । थ्व गलत सोच खः । थुकियात मलजन विया हःपाः वीगु कुतः जुइमज्यू । नेपाली कांग्रेसं राजधानी प्रदेशया धारणा न्ह्यःने हयाः गैर नेवाःतय्गु वस्ति वा सहर दयेकेत उदृत खनेदु । स्वनिगः अप्वःपाखे अप्वः ८-१० लाख च्वनेत पाय्छि जुइ । तर थौं ३० लाखं मयाक मनूत थन च्वनाच्वंगु दु । थुकियात थनया आदिवासी नेवाःत म्वायेतहे थाकुल । लः मदु, धः मदु, बुँ दक्को छेँ दनाः मदये धुंकल । बांलाःगु वातावरण मदये धुंकल । धार्मिक, पुरातात्विक व वहुमूल्य मूर्तित मदयेधुंकल । देगलं द्यःत मदये धुंकल । युरोप व अमेरिकाया म्युजियमत जायेकेत मनूतय्सं तछाद मछाद यानाच्वंगु दु । दुगुयात संरक्षण यायेगु व स्यंगुयात भिंकेगु पल्सा कांग्रेसं थन राजधानी प्रदेशया धारणा न्ह्यःने हयाः स्वनिगः दुनेया ऐतिहासिक, धार्मिक व पुरातात्विक गरिमायात पूर्णत व ठाडो अस्वीकार याःगु दु । स्यनावनाच्वंगु स्वनिगःयात थप स्यंकेगु मनस्थितिं न्ह्यःनेवःगु खँय् शंखाहे मदु ।

नेवाःत थौंकन्हय् १३ लाख व वंगु जनसंख्याय् तथ्यांक कथं १५-१८ लाख थ्यनीगु अनुमान यानातःगु दु । नेपालय् १०१ जाति व ९२ गू भाषात प्रयोगय् वयाच्वंगु दु । आदिवासी जनजाति महासंघय् जक ५५ जातत दुथ्यानाच्वंगु दु । सरकारं ५९ गू जातियात आदिवासी धलखय् तयातःगु दु । नेपाली वाहेक १७ गू भाषाय् पाठय्क्रमत दयेकाः न्यागू तगिंतक्क आखः ब्वंकेगु ज्या जुयाच्वंगु दु । दच्छिया छगू भाषाया थप यायेगु कथं पाठय्क्रम स्वीकृति जुयाः थीथी ९ व १० तगिंया इच्छिक भाषाकथं ब्वंकेगु प्रकृयाय् वनेत्यंगु दु । नेवाः स्वायत्त राज्य घोषणा लिपा नेवाःतय्त माःगु ग्वाहालि व लिधँसा वीगु पल्सा नेपाली कांग्रेसं राजधानी प्रदेशया अवधारणा हयाः नेवाःतय्तसं थौं तक्क देश जनता व खुद नेपाली कांग्रेसयात याना वःगु ग्वाहालियात लोमंकेगु घृष्टता जक याःगु मखु खुद कांग्रेस पार्टीयात नेवाःत माःगु मदु, वइगु पार्टी दुने नेवाःतय्सं वियावयाच्वंगु योगदानयात लुमंकेत स्वःगु स्पष्ट दु । आः नेवाः विरोधी पार्टीतय्गु धलखय् नेपाली कांग्रेस दकले न्ह्यःने व दकले च्वय् दइसा नेवाःतय्गु नितिं कांग्रेसं वीगु छुं मदु व कायेत जक सारा संसार दु धयागु गलत चिन्तनया शिकार नेपाली कांग्रेस दु ।

नेवाः स्वायत्त राज्यया पक्षय् दनाः नेवाःतय्गु ग्वाहालि व समर्थन यानाः कुहां वयेमाःम्ह नेपाली कांग्रेसं राजधानी प्रदेशया वकालत यानाः १५ लाख नेवाःतय्गु विरुद्ध दंवःगु जक मखु, वल्कि ६० प्रतिशत आदिवासी जनजातितय्गु विरुद्ध दनाः छगू कथंया नकारातमक राजनीति यायेगु घृष्टता याःगु दु । नेवाःत व आदिवासी जनजातिया विरुद्ध दनाः नेपाली कांग्रेसं थःगु राजनीतिक व वौद्धिक चिन्तनयात आर्यघाटय् त्वःतूगु अनुभूति जुयाच्वंगु दु । वीपी व गिरिजा लिपा अभिभावकविहिन अवस्थाय् लाःगु कांग्रेस आः हानाः मदुगु व लावारिस विहिन पार्टीया रुपय् मात्रै १७ औं शताब्दिया सोच व मानसिकता घानाः न्ह्याः वनाच्वंगु दु । यथार्थय् कांग्रेस संघीयता विरोधी, राज्य पुनर्संरचना विरोधी, धर्म निरपेक्षता विरोधीया रुपं न्ह्यःने वयाच्वंगु नेपाली कांग्रेस पार्टी कम व स्वार्थवश आवद्ध समूह जक मखुला ? प्रष्ट जुइगु ई वःगु दु । शान्ति व संविधान विरोधी कांग्रेसं आः छु राजनीतिक एजेण्डा ज्वनाः न्ह्याः वनेगु ? नेवाःतय्सं न्यँने ल्यं थ्वहे छगू न्ह्यसः खः ।

More Stories Like this