प्राधिकरणय् जुयाच्वंगु भ्रष्टाचार पनाः सेवामुखी संस्थान दयेकेमाः

नेपाल विद्युत प्राधिकरण व लोड सेडिङ्गया पयार्य शब्दकथं लुमंकेगु यानावयाच्वंपिं नेपाली जनतां आः वयाः अन दुने जुयाच्वंगु भ्रष्टाचारयात कयाः चिवा चर्चा यायेगु यानाहःगु दु । पलाः पत्तिं भ्रष्टाचारय् चुर्लुम्म दुवय् जुयाच्वंगु प्राधिकरणयात भ्रष्टाचारं मुक्त मयासे मगाःगु निष्कर्षय् जनता थ्यंगु दु । न्ह्याम्ह जोगी वःसां न्हाय्पं चिरेयानातःम्ह धाःथें करौडौंया घुस कयाः प्रमुख नियुक्त यायेगु परम्परायात धाःसा थुगसी त्वा थःगु दु । प्राधिकरणया कार्यकारी निर्देशक दीपेन्द्र शर्मायात दकले न्हापां प्रतिस्पर्धाया आधारय् जल श्रोतया ज्ञाता तर नेपाली जनतातय्गु नितिं पूर्णत न्हूम्ह दिपेन्द्र शर्मायात ल्यःगु दु । वयकः थ्व भ्रष्टाचारया गठया रुपय् परिचित प्राधिकरणयात गुलित भ्रष्टाचारं मुक्त यायेत ताःलाइगु खः स्वयेत छुं ई पीहे मानि ।

कर्मचारीया संख्याया ल्याखं स्थायी व करार यानाः ११ द्वः ६८ म्ह कर्मचारीत दुगु थुगु प्राधिकरणय् थ्व माक्को यासे अप्वः खः । स्थायी कर्मचारी जक ७ द्वः ९५० म्ह दु । राजनीतिक पार्टीया मनू कार्यकर्तात भर्ना यायेगु थाय् कथं जुयाच्वंगु थुगु प्राधिकरणय् सु कर्मचारी छु ज्या याइगु धयागु वारे सुनांहे धायेफूगु अवस्था मदु । सु मनू गन दु व छु विभाग वा शाखाय् ग्वःम्ह कर्मचारीतय्सं ज्या याइ धयागु जानकारी नं थन सुयाकेहे मदु । न्हू न्हूगु गाडी व थिेक थिकेगु गाडी न्याइगु थुगु प्राधिकरणयाके भौतिक सम्पत्ति गुलि दु धयागु वारे छुंहे रेकर्ड तयातःगु मदु । प्राधिकरणया थिकेगु डजनौं गाडीत जक कांग्रेस व एमालेया नेतातय्सं गयाच्वंगु दु । ड्राइभर नं प्राधिकरणया चिकंनं प्राधिकरणया ज्या धाःसा कांग्रेस व एमालेया पार्टीया नेतातय्सं यानावयाच्वंगु दु । १ करोड वंगु गाडीया ग्वलंग्वः सुनां यंकातल धयागु तथ्यांक नं प्राधिकरणयाके मदु ।

प्राधिकरणया नामय् करीव झिंस्वथाय् झिंन्याथाय् करौडौंया जग्गात दु । तर थुकियात वास्ता मयायेवं प्राधिकरणयाहे मनूत व भूमाफियातय्सं अतिक्रमण यानाः नयावी धुंकूगु दु । बालाजुइ जक प्राधिकरणया १६ रोपनी जग्गा दु, तर उकिया हालत छु दु थौं सुनां मस्यू । कर्मचारीतय्गु संख्या अप्वः दुगु व ज्या यायेत ज्यो मदयाः गुलिखय् कर्मचारीत हाजिर जक यानाः तलव पाकय् यानाच्वंपिंहे सलंसः दु धाइ । थुज्वःपिं व्यकार व व्यर्थयाःपिं कर्मचारीतय्त ठीक याइम्ह सु ? प्राधिकरण थौं २८ अर्व ध्यबाया ऋण क्वबुया च्वंगु दु । थुगुहे कथं अनावश्यक रुपं ध्यबा त्यासा कायां वन धाःसा प्राधिकरणया टाट पल्टय् जुइत आइतवाः मालीमखु । थौं प्राधिकरणया न्ह्यःने ऐनकथं विद्युत उत्पादन, प्रसारण व वितरणयात व्यवस्थित यायेमाःगु दु । प्राधिकरणया मू ज्या धयागुहे भरपर्दो सर्वसुलभ यानाः विद्युत आपूर्तियात वैज्ञानिक ढंगं व्यवस्थित यायेगु खः । गुकिया नितिं माःगु व्यवस्था यायेफयेमाः । थौं कन्हय् लोडसेडिङ्ग म्हो जूसां सुख्खायाम वयेत ताः ई पी मालीमखुत थुकिया नितिं छु गुगु व्यवस्था यायेगु ? प्राधिकरणया न्हूगु नेतृत्व थुखेपाखे ध्यान वियाः थौंहे माःगु व्यवस्था यानाः जनतायात लोडसेडिङ्गया मार मुक्त यायेमाःगु दु । योजनाय् लानाच्वंगु आयोजनात पूवंकेगु पाखे ध्यानवीमाः । खर्च अप्वःसां लोडसेडिङ्गया मार फयेम्वायेक थर्मल विद्युतया व्यवस्था यानाःसां आपूर्तिं सहज यायेमाः । नाफा कमय् यायेगु स्वयाः जनतायात सेवा वीगु प्राधिकरणया उदेश्य जुइमाः ।

More Stories Like this