नेवाः राज्यया नितिं लोकतान्त्रिक दबूपाखें कांग्रेसयात पौ बिइगु

येँ (झीगु स्वनिगः)

नेपाली कांग्रेसया नेवाःतय्सं नेवाः स्वायत्त राज्यया आन्दोलनया नितिं नीस्वंगु लोकतान्त्रिक नेवाः दबूपाखें नेवाः नेपाली कांग्रेसयात नेवाः स्वायत्त राज्यया नितिं पौ बिइगु जूगु दु । नेपाली कांग्रेसय् संघीयता व राज्य पुनर्संरचनाया विषयसं नेवाः प्रदेशया थासय् राजधानी प्रदेश यायेगु धकाः हःगु प्रस्तावयात अस्वीकार यायेगु खँ न्ह्यथसें पौ हे बिइगु धकाः लोकतान्त्रिक नेवाः दबूया म्हिगः सोमवाः जूगु तःमुँज्यां निर्णय याःगु दु । नायः गजेन्द्र मानन्धरं बियादीगु जानकारी कथं थीथी राजीतिक दल नापं नेपाली कांग्रेसपाखें राजधानी प्रदेश धकाः खँ हयाच्वंगुयात अस्वीकार यायेगु जुइ धयादिसें नेवाः प्रदेश -नेपाल मण्डल) दयेकेमाः धकाः माग यायेगु नापं संविधानया राज्य पुनर्संरचना समितिं तयार याःगु नेवाः प्रदेशया लागा मगा धकाः तकं प्रस्ताव पारित याःगु दु ।

कांग्रेसया सांसद नापं दबूया सल्लाहकार तीर्थराम डंगोलया मूपाहांसुइ जूगु उगु तःमुँज्यां नायः गजेन्द्र मानन्धर, अथे हे दुजलय् महेन्द्रमान सिंह, डा. अनुप श्रेष्ठाचार्य, भगवान शाक्य, राजभाई शाक्य, रज्जुतम श्रेष्ठ, जगदीश नेपाली, योगेन्द्रमान श्रेष्ठ, शैलेश शाक्य बरेजु, रामनारायण महर्जन, मय्जु जीवन डंगोल, मय्जु डा. कुशुम शाक्य व सारगत पुतवार नापं यानाः १५ म्हेसिया ज्यासना पुचः ल्यःगु दु । मुँज्या च्वनाः पदाधिकारी ल्यइगु जूगु दु । उगु तःमुँज्याय् कांग्रेसया नेतात भिमसेनदास प्रधान, मार्शल जुलुम शाक्य, उत्तमनारयाण श्रेष्ठपिन्सं नं भिंतुना न्वचू बियादीगु खः ।