आन्दोलनया बलं प्रा. डा. हिराबहादुर उपकुलपति

श्रीकृष्ण महर्जन

किपूया नेवाःतय्सं थौंसिबें खुगू दशक न्ह्यःनिसें यानाच्वंगु आन्दोलनया बलं अन्ततः त्रिभुवन विश्व विद्यालयया उपकुलपतिइ किपूमि प्राध्यापक डा. हिराबहादुर महर्जन नियुक्ति जूगु दु । किपूमितय्गु जग्गा अधिग्रहण यानाः काःगु इलय् तत्कालिन सरकारं त्रिभुवन विश्व विद्यालयया नितिं माःगु फुक्कं कथंया जनशक्ति नापं मेमेगु ख्यलय् तकं किपूमितय्त प्राथमिकता बिइगु धकाः सहमति यानातःगुयात कार्यान्वयन यायेमाः धकाः माग यानाः लिपांगु इलय् वयाः नेवाः स्वायत्त राज्य मंकाः परिषद् किपूपाखें आन्दोलन यानाः वयाच्वंगु खः । त्रिविइ दुने किपूया योग्यता व क्षमतादुपिं जनशक्तियात न्हापांगु प्राथमिकता बिइमाःगु नापं त्रिविइ किपूमि नेवाःतय्गु अग्राधिकार दयेमाः धकाः माग यानाः आन्दोलन यानाः वयाच्वंगु खःसा छुं दिं न्ह्यः जक उपकुलपतिइ किपूमि हे नियुक्ति यायेमाः धकाः माग तकं याःगु खः ।

थ्व हे झ्वलय् किपूमि प्राध्यापक डा. हिराबहादुर महर्जनयात त्रिविइ उपकुलपतिइ नियुक्ति याःगुलिं नेवाः स्वायत्त राज्य मंकाः परिषद्या नायः पुचःया कजि पञ्चलाल महर्जन, नायः पुचःया दुजःपिं नजरराम महर्जन, राममान सिंह व कृष्णहरी महर्जनं मंकाः कथं विज्ञप्ति पिथनाः किपूमितय्गु आन्दोलनया बलं प्रा. डा. हिराबहादुर महर्जन नियुक्ति जूगुलिं लसता प्वंकुसें वय्कःयात भिंतुना नं देछाःगु दु । आन्दोलनया बलं छगू उपलब्धी जूगु दु धासें किपूमितय्गु त्रिविइ थःपिनिगु अग्राधिकार स्थापित यायेगु नितिं अझ सशक्त कथं न्ह्याः वनेत विज्ञप्तिइ इनाप नं यानातःगु खः । त्रिभुवन विश्व विद्यालयया उपकुलपतिइ नियुक्ति जूम्ह प्राध्यापक डा. हिराबहादुर न्हापांम्ह किपूमि खः ।

त्रिभुवन विश्व विद्यालयया उपकुलपतिइ नियुक्ति जुयादीम्ह प्रा. डा. हिराबहादुर महर्जनया जन्म किपूया गःछेँ त्वालय् खःसा थौन्हय् किपूया नयाँबजार लागाया निखासी लागाय् च्वनाच्वंगु दु । वय्कः छम्ह ज्यापुया काय्मचा जुयाः कलेजय् वनीगु इलय् तकं थःगु बुँ पालेगु तकं ज्या यानादीम्ह खः । सामाजीक नापं किपूया शिक्षा क्षेत्रय् तःधंगु योगदान यानादीम्ह प्रा. डा. हिराबहादुर महर्जन छुं दँ न्ह्यः जक त्रिविया केन्द्रीय क्याम्पस कीर्तिपुरया पि्रन्सिपल जुयाः तकं ज्या यानादी धुंकूम्ह खः । किपूमितय्गु भावना थूम्ह जूगुलिं आः वय्कः महर्जन हे त्रिविया उपकुलपतिइ नियुक्ति जुयादीगुलिं किपूमित तसकं लय्ताःगु दुसा किपूमितय्गु भावना कथं ज्या यानादी धकाः किपूया नेवाःतय्सं आशा नं याःगु दु ।